By വാട്‌സ്ആപ്പിന് ശക്തമായ ഇന്ത്യൻ ബദലായി ശ്രദ്ധനേടിയ സോഹോ, തങ്ങളുടെ പ്രമുഖ മെസേജിങ് ആപ്പായ ‘അരട്ടൈ’യുടെ പുതിയ ബിസിനസ് പതിപ്പ് പുറത്തിറക്കി. ഉപഭോക്താക്കളും ജീവനക്കാരും തമ്മിലുള്ള ആശയവിനിമയം കൂടുതൽ സുഗമമാക്കുക എന്ന ലക്ഷ്യത്തോടെയാണ് ‘അരട്ടൈ ബിസിനസ്’ വിപണിയിലെത്തിച്ചിരിക്കുന്നത്. സോഹോ സ്ഥാപകൻ ശ്രീധർ വെമ്പുവാണ് എക്സ് (ട്വിറ്റർ) പ്ലാറ്റ്‌‌ഫോമിലൂടെ ഈ പുതിയ സേവനത്തിന്റെ പ്രഖ്യാപനം നടത്തിയത്. ഇന്ത്യൻ ബിസിനസുകൾക്കായി പ്രത്യേകം രൂപകൽപ്പന ചെയ്ത ഈ ആപ്പ്, നിലവിൽ വിപണി ഭരിക്കുന്ന വാട്‌സ്ആപ്പ് ബിസിനസിന് കടുത്ത വെല്ലുവിളിയാകുമെന്നാണ് വിലയിരുത്തപ്പെടുന്നത്.
ആപ്പിന് പുറമെ, സ്ഥാപനങ്ങളുടെ വിവിധ പ്രവർത്തനങ്ങൾ ഏകോപിപ്പിക്കാൻ സഹായിക്കുന്ന ‘അരട്ടൈ ബിസിനസ് പ്ലാറ്റ്‌ഫോമും’ കമ്പനി അവതരിപ്പിച്ചിട്ടുണ്ട്. പൊതുസേവനങ്ങൾക്ക് മുൻഗണന നൽകിക്കൊണ്ട് സർക്കാർ സ്ഥാപനങ്ങൾക്കും റെയിൽവേയ്ക്കും ഈ പ്ലാറ്റ്‌ഫോം പൂർണ്ണമായും സൗജന്യമായി ഉപയോഗിക്കാമെന്നതാണ് ഇതിന്റെ ഏറ്റവും വലിയ പ്രത്യേകത. കൂടാതെ, ആരോഗ്യ-വിദ്യാഭ്യാസ മേഖലകളെ പിന്തുണയ്ക്കുന്നതിനായി പ്രതിമാസം 10 ലക്ഷം സന്ദേശങ്ങൾ വരെ സൗജന്യമായി അയക്കാനുള്ള പ്രത്യേക ആനുകൂല്യവും സോഹോ പ്രഖ്യാപിച്ചിട്ടുണ്ട്.
പൂർണ്ണമായ സുരക്ഷ ഉറപ്പാക്കുന്ന എൻഡ്-ടു-എൻഡ് എൻക്രിപ്ഷൻ, വിവിധ ഡിവൈസുകളിലെ സംഭാഷണങ്ങൾ സുരക്ഷിതമായി സിങ്ക് ചെയ്യാനുള്ള സൗകര്യം എന്നിവയാണ് ഇതിന്റെ പ്രധാന ആകർഷണങ്ങൾ. ഉപഭോക്താക്കളുടെ ഡാറ്റാ സുരക്ഷയ്ക്ക് പ്രാധാന്യം നൽകുന്ന ഇതിൽ കമ്പനികളുടെ വിവരങ്ങളുടെ പൂർണ്ണ ഉടമസ്ഥാവകാശം ഉപഭോക്താക്കൾക്ക് തന്നെയായിരിക്കും. സ്ഥാപനത്തിനുള്ളിലെ ആന്തരിക ആശയവിനിമയത്തിനും ബാഹ്യ ഉപഭോക്തൃ സേവനങ്ങൾക്കും ഒരേപോലെ ഒരൊറ്റ പ്ലാറ്റ്‌ഫോം ഉപയോഗിക്കാമെന്നത് ബിസിനസുകൾക്ക് വലിയ രീതിയിൽ സഹായകരമാകും.
