By ഗൂഗിളിന്റെ ജനപ്രിയ എഐ അസിസ്റ്റന്റായ ജെമിനിയുടെ വിൻഡോസ് ഡെസ്ക്ടോപ്പ് ആപ്പ് പുറത്തിറങ്ങി. വിൻഡോസ് 10, വിൻഡോസ് 11 ഓപ്പറേറ്റിങ് സിസ്റ്റങ്ങളിൽ പ്രവർത്തിക്കുന്ന കമ്പ്യൂട്ടറുകൾക്കായാണ് ഗൂഗിൾ ഈ പുതിയ ആപ്പ് ഒരുക്കിയിരിക്കുന്നത്. മാക് ഒഎസിനായുള്ള ആപ്പ് നേരത്തെ പുറത്തിറങ്ങിയതിന് പിന്നാലെയാണ് ഇപ്പോൾ വിൻഡോസ് ഉപയോക്താക്കൾക്കു വേണ്ടിയും ഇത് ലഭ്യമാക്കിയിരിക്കുന്നത്. ഇനി മുതൽ വെബ് ബ്രൗസറുകളുടെ സഹായമില്ലാതെ തന്നെ കമ്പ്യൂട്ടറിൽ നേരിട്ട് ജെമിനിയുടെ സേവനങ്ങൾ ഉപയോഗപ്പെടുത്താൻ സാധിക്കുമെന്നത് ഉപയോക്താക്കൾക്ക് വലിയൊരു ആശ്വാസമാകും.
കമ്പ്യൂട്ടർ ജോലികൾ അതിവേഗത്തിലാക്കാൻ സഹായിക്കുന്ന അത്യാധുനിക ഫീച്ചറുകളാണ് ഈ ആപ്പിൽ ഉൾപ്പെടുത്തിയിരിക്കുന്നത്. കീബോർഡിലെ ‘Alt + Space’ കീകൾ അമർത്തിയാൽ ഏത് സമയത്തും ജെമിനി ആപ്പ് സ്ക്രീനിൽ ഓവർലേ ആയി തുറക്കാനാകും. ഡോക്യുമെന്റുകൾ പരിശോധിക്കാനും, ഇമെയിലുകൾക്ക് മറുപടി തയ്യാറാക്കാനും, പ്രസന്റേഷനുകൾക്കായി പുതിയ ആശയങ്ങൾ കണ്ടെത്താനും ഇത് ഏറെ സഹായിക്കും. കൂടാതെ ജിമെയിൽ, ഗൂഗിൾ ഡ്രൈവ് തുടങ്ങിയ വർക്ക്സ്പേസ് സേവനങ്ങളുമായി ബന്ധിപ്പിച്ച് ഫയലുകളിൽ നിന്നുള്ള വിവരങ്ങൾ നേരിട്ട് എടുക്കാനും, ചിത്രങ്ങളും വീഡിയോകളും നിർമ്മിക്കാനുമുള്ള ക്രിയേറ്റീവ് ടൂളുകളും ഇതിൽ സജ്ജീകരിച്ചിട്ടുണ്ട്.
