By ഇന്ത്യൻ സ്മാർട്ട്ഫോൺ വിപണിയെ ഞെട്ടിച്ചുകൊണ്ട് സാംസങ് ഗാലക്സി S26 സീരീസിലെ എല്ലാ ഫോൺ മോഡലുകൾക്കും 20,000 രൂപ വീതം വില വർധിപ്പിച്ചു. സെപ്റ്റംബർ 18 മുതൽ പുതിയ നിരക്കുകൾ പ്രാബല്യത്തിൽ വന്നു. ആഗോളതലത്തിൽ ആർട്ടിഫിഷ്യൽ ഇന്റലിജൻസ് (എഐ) സാങ്കേതികവിദ്യയുടെ വളർച്ചയെത്തുടർന്ന് മെമ്മറി ചിപ്പുകൾക്കുണ്ടായ കടുത്ത ക്ഷാമമാണ് ഈ വലിയ വിലവർധനവിന് പ്രധാന കാരണമായി ചൂണ്ടിക്കാണിക്കപ്പെടുന്നത്.
ആപ്പിളിന്റെ പുതിയ ഐഫോൺ 18 പ്രോ സീരീസ് വിപണിയിലെത്തിയ അതേ ദിവസമാണ് സാംസങ്ങും വില വർധിപ്പിച്ചത്. ഐഫോൺ പുതിയ മോഡലുകൾക്ക് 30,000 രൂപയോളം വില കൂട്ടിയതിന് തൊട്ടുപിന്നാലെയാണ് സാംസങ്ങിന്റെയും ഈ നീക്കം. ഇതോടെ പ്രീമിയം ഫോണുകൾ സ്വന്തമാക്കാൻ ഉപഭോക്താക്കൾ ഇനി വലിയ തുക മുടക്കേണ്ടി വരും.
വില വർധനവോടെ ഗാലക്സി S26 അടിസ്ഥാന മോഡലിന്റെ വില 87,999 രൂപയിൽ നിന്ന് 1,07,999 രൂപയായും, പ്ലസ് വേരിയന്റിന്റെ വില 1,39,999 രൂപയായും ഉയർന്നു. ഏറ്റവും ഉയർന്ന മോഡലായ ഗാലക്സി S26 അൾട്രാ 1TB പതിപ്പിന്റെ വില 1,89,999 രൂപയിൽ നിന്ന് 2,09,999 രൂപയായാണ് ഉയർന്നത്. സാംസങ്ങിന്റെ ഏഴോളം പ്രധാന ഫോണുകൾക്ക് ഒരേപോലെ 20,000 രൂപയുടെ വർധനവാണ് നടപ്പിലാക്കിയിരിക്കുന്നത്.
