By വൺപ്ലസ് 15ന്റെ വലിയ വിജയത്തിന് ശേഷം വൺപ്ലസ് 16 സ്മാർട്ട്ഫോണിനെക്കുറിച്ചുള്ള നിർണായക വിവരങ്ങൾ പുറത്ത്. പുതിയ ഫോൺ ഡിസ്പ്ലേയിൽ വമ്പൻ മാറ്റങ്ങളുമായായിരിക്കും വിപണിയിലെത്തുകയെന്നാണ് റിപ്പോർട്ടുകൾ സൂചിപ്പിക്കുന്നത്. ബിഒഇയുമായി ചേർന്ന് വൺപ്ലസ് പ്രത്യേകം വികസിപ്പിച്ച പുതിയ ‘X4’ പ്രകാശവിതരണ സാങ്കേതികവിദ്യയാണ് ഇതിൽ ഉപയോഗിക്കുന്നത്. മുൻ മോഡലിലെ X3 സാങ്കേതികവിദ്യയേക്കാൾ മികച്ച വൈദ്യുതി കാര്യക്ഷമതയും ഇരട്ടി ആയുസ്സും നൽകാൻ X4 ഡിസ്പ്ലേയ്ക്ക് സാധിക്കും. നാല് വശങ്ങളിലും വളരെ നേർത്ത ബെസലുകളുള്ള ഫ്ലാറ്റ് ഡിസ്പ്ലേയായിരിക്കും ഫോണിൽ നൽകുക.
ഗെയിമിങ്ങിലും ദിനംപ്രതിയുള്ള ഉപയോഗത്തിലും അതിശയിപ്പിക്കുന്ന ദൃശ്യാനുഭവം ഉറപ്പാക്കാൻ 185 ഹെർട്സ് (185Hz) വരെ ഉയർന്ന റിഫ്രഷ് നിരക്ക് ഈ ഡിസ്പ്ലേയിൽ ലഭിച്ചേക്കും. അതോടൊപ്പം സ്നാപ്ഡ്രാഗൺ 8 എലൈറ്റ് ജെൻ 6 പ്രോ പ്രോസസറായിരിക്കും ഫോണിന് കരുത്തേകുക എന്നാണ് വിവരചോർച്ച സൂചിപ്പിക്കുന്നത്. ചൈനയിൽ അടിസ്ഥാന മോഡലിന് (8GB+256GB) 4,999 യുവാൻ (ഇന്ത്യൻ രൂപയിൽ ഏകദേശം 71,000 രൂപ) വില പ്രതീക്ഷിക്കുന്നുണ്ടെങ്കിലും, ഇന്ത്യയിൽ എത്തുമ്പോൾ നിരക്കിൽ മാറ്റങ്ങൾ ഉണ്ടായേക്കാം.
