By അമേരിക്കയിൽ നിർമിക്കപ്പെട്ടതിൽ വെച്ച് ഏറ്റവും ശേഷിയേറിയ ഓപ്പൺ-വെയ്റ്റ് നിർമിതബുദ്ധി മോഡലായ ‘മ്യൂസ് സ്പാർക്ക് ഓപ്പൺ’ മെറ്റ പുറത്തിറക്കി. ചിത്രങ്ങൾ, വീഡിയോകൾ, ഡോക്യുമെന്റുകൾ എന്നിവ ഒരേസമയം കൈകാര്യം ചെയ്യാൻ സാധിക്കുന്ന വിപുലമായ മൾട്ടി മോഡൽ ശേഷിയാണ് ഇതിന്റെ പ്രധാന സവിശേഷത. 816 ബില്യൺ പാരാമീറ്ററുകളും 1 മില്യൺ ടോക്കണുകൾ വരെ ഉൾക്കൊള്ളാൻ ശേഷിയുള്ള കൂറ്റൻ കോൺടെക്സ്റ്റ് വിൻഡോയുമുള്ള ഈ മോഡൽ, സങ്കീർണ്ണമായ കോഡിംഗ് ജോലികൾക്കും ഓട്ടോമേറ്റഡ് ഏജന്റ് വർക്ക്‌ഫ്ലോകൾക്കും വേണ്ടിയാണ് പ്രധാനമായും രൂപകൽപ്പന ചെയ്തിരിക്കുന്നത്.
ആപ്പിളിന്റെ മാക് കമ്പ്യൂട്ടറുകളിൽ ലോക്കലായി പ്രവർത്തിക്കാൻ ശേഷിയുള്ള രീതിയിലാണ് ഇതിന്റെ നിർമാണം. സിസ്റ്റത്തിൽ ലോക്കലായി പ്രവർത്തിപ്പിക്കാൻ കുറഞ്ഞത് 1 ടെറാബൈറ്റ് റാം ആവശ്യമായ ഈ മോഡൽ, ആപ്പിളിന്റെ പുതിയ M5 അൾട്രാ ചിപ്പ് ഘടിപ്പിച്ച മാക് സ്റ്റുഡിയോകളിലാണ് ഏറ്റവും വേഗതയിൽ പ്രവർത്തിക്കുക. സങ്കീർണ്ണമായ പ്രോസസിംഗുകൾക്കായി രണ്ട് മാക് സ്റ്റുഡിയോകൾ തമ്മിൽ ബന്ധിപ്പിക്കേണ്ടി വന്നേക്കാം. പ്രമുഖ വീഡിയോ എഡിറ്റിംഗ് സോഫ്റ്റ്‌വെയറായ ‘ഡാവിൻചി റിസോൾവ്’ ഉപയോഗിച്ച് വീഡിയോ ഫൂട്ടേജുകൾ അപഗ്രഥിക്കാനും കൃത്യമായി ക്രോപ്പ് ചെയ്യാനും ഈ പുതിയ എഐ മോഡലിന് സാധിക്കും.
