By അടുത്ത തലമുറ മൊബൈൽ ഇന്റർനെറ്റ് സാങ്കേതികവിദ്യയായ 6ജിയിലേക്ക് വമ്പൻ കുതിച്ചുചാട്ടത്തിനൊരുങ്ങി ഇന്ത്യ. 2030ഓടെ രാജ്യത്ത് 6ജി മൊബൈൽ സേവനങ്ങൾ ലഭ്യമാക്കുന്ന ആദ്യ രാജ്യങ്ങളിൽ ഇന്ത്യയും ഉണ്ടാകുമെന്ന് റിലയൻസ് ജിയോ പ്രഖ്യാപിച്ചു. ന്യൂഡൽഹിയിൽ നടക്കുന്ന ഇന്ത്യ മൊബൈൽ കോൺഗ്രസിൽ ജിയോയുടെ പ്രീ-6ജി സംവിധാനവും ഇന്ത്യയിലെ ആദ്യത്തെ ഗിഗാ മൈമോ റേഡിയോയും പ്രദർശിപ്പിച്ചതോടെയാണ് ഈ നിർണായക പ്രഖ്യാപനം പുറത്തുവന്നത്. നിലവിലെ 5ജി ശൃംഖലകളെ അപേക്ഷിച്ച് അഞ്ച് മടങ്ങ് ശേഷിയും പത്തിലൊന്നായി കുറഞ്ഞ ലേറ്റൻസിയും പുതിയ 6ജി സാങ്കേതികവിദ്യ വാഗ്ദാനം ചെയ്യുന്നുണ്ട്.
വേഗമേറിയ കണക്റ്റിവിറ്റിക്കപ്പുറം ഒട്ടേറെ മേഖലകളിൽ വിപ്ലവകരമായ മാറ്റങ്ങൾ സൃഷ്ടിക്കാൻ 6ജിക്ക് കഴിയുമെന്നാണ് വിലയിരുത്തപ്പെടുന്നത്. തത്സമയ കൃത്രിമബുദ്ധി സേവനങ്ങൾ, ഹോളോഗ്രാഫിക് വീഡിയോ ആശയവിനിമയം, വിദൂര ആരോഗ്യസേവനങ്ങൾ, നൂതന ഡിജിറ്റൽ വിദ്യാഭ്യാസം തുടങ്ങിയവയ്ക്ക് ഈ സാങ്കേതികവിദ്യ ശക്തമായ അടിത്തറയാകുമെന്ന് ജിയോ വ്യക്തമാക്കുന്നു. കുറഞ്ഞ ലേറ്റൻസി വഴി ഡാറ്റ കൈമാറുന്നതിലെ കാലതാമസം പൂർണ്ണമായും ഒഴിവാക്കാനും, കൂടുതൽ ശൃംഖലാ ശേഷിയിലൂടെ ഒരേസമയം വലിയ തോതിൽ വിവരങ്ങൾ കൈകാര്യം ചെയ്യാനും ഇതിലൂടെ സാധിക്കും.
6ജി സാങ്കേതികവിദ്യയുടെ വികസനത്തിൽ ആഗോളതലത്തിൽ ശക്തമായ പങ്കാളിത്തം ഉറപ്പാക്കാനുള്ള നിർണായക നീക്കങ്ങളും ജിയോ ഇതിനോടകം നടത്തിക്കഴിഞ്ഞു. ഇതുവരെ 8,000ത്തിലധികം പേറ്റന്റുകൾ ഫയൽ ചെയ്ത കമ്പനി, ആഗോള 6ജി മാനദണ്ഡങ്ങൾ രൂപീകരിക്കുന്നതിനായി വിവിധ അന്താരാഷ്ട്ര ഏജൻസികൾക്ക് 934ലധികം സാങ്കേതിക സംഭാവനകളും സമർപ്പിച്ചിട്ടുണ്ട്. 6ജിയുടെ ഭാവി രൂപപ്പെടുത്തുന്നതിൽ തദ്ദേശീയ ഗവേഷണത്തിനും കൃത്യമായ മാനദണ്ഡങ്ങൾ വികസിപ്പിക്കുന്നതിനും കമ്പനി മുൻഗണന നൽകുന്നുവെന്നാണ് ഈ കണക്കുകൾ വ്യക്തമാക്കുന്നത്.
