By ആപ്പിളിന്റെ അടുത്ത തലമുറ സ്മാർട്ട്ഫോൺ നിരയായ ഐഫോൺ 18 പ്രോ, ഐഫോൺ 18 പ്രോ മാക്സ് മോഡലുകൾ സെപ്റ്റംബറിൽ പുറത്തിറങ്ങിയേക്കുമെന്ന് പുതിയ റിപ്പോർട്ടുകൾ. കമ്പനിയുടെ ആദ്യ ഫോൾഡബിൾ ഫോണിനൊപ്പം സെപ്റ്റംബർ 9-ന് പുതിയ ഐഫോണുകളുടെ അവതരണം നടന്നേക്കുമെന്നാണ് പ്രതീക്ഷിക്കുന്നത്. ഏറ്റവും പുതിയ 2 നാനോമീറ്റർ സാങ്കേതികവിദ്യയിൽ നിർമ്മിക്കുന്ന എ20 പ്രോ ചിപ്പാണ് ഈ ഫോണിന്റെ പ്രധാന ആകർഷണം. ഇത് ഉയർന്ന പ്രകടനക്ഷമതയും മികച്ച ആർട്ടിഫിഷ്യൽ ഇന്റലിജൻസ് അനുഭവവും വാഗ്ദാനം ചെയ്യുന്നു. കൂടാതെ ആപ്പിൾ സ്വന്തമായി വികസിപ്പിക്കുന്ന പുതിയ സി2 മോഡം വഴി അതിവേഗ 5ജി കണക്റ്റിവിറ്റിയും കുറഞ്ഞ വൈദ്യുതി ഉപയോഗവും സാധ്യമാകും.
മികച്ച ബാറ്ററി ബാക്കപ്പും ഡിസ്പ്ലേ സാങ്കേതികവിദ്യയുമാണ് പുതിയ സീരീസിന്റെ മറ്റൊരു പ്രത്യേകത. ഐഫോൺ 18 പ്രോ മാക്സിൽ അമേരിക്കൻ പതിപ്പിൽ 5,425 mAh വരെയും ഫിസിക്കൽ സിം പതിപ്പിൽ 5,235 mAh വരെയും ശേഷിയുള്ള വലിയ ബാറ്ററികൾ പ്രതീക്ഷിക്കുന്നുണ്ട്. കൂടുതൽ ഊർജക്ഷമത നൽകുന്ന പുതിയ എൽടിപിഒ പ്ലസ് ഡിസ്പ്ലേ കൂടിച്ചേരുമ്പോൾ ബാറ്ററി ലൈഫിൽ ഗണ്യമായ വർധനവ് ഉണ്ടാകും. നിലവിലെ ഐഫോൺ 17 പ്രോ സീരീസേക്കാൾ വലിയ അപ്ഗ്രേഡുകളാണ് പുതിയ പ്രോ മോഡലുകളിൽ ഒരുക്കിയിരിക്കുന്നത്.
