By എലോൺ മസ്കിന്റെ ബഹിരാകാശ ഗവേഷണ സ്ഥാപനമായ സ്പേസ് എക്സിന്റെ ചരിത്രപ്രസിദ്ധമായ ഐപിഒയ്ക്ക് പിന്നാലെ ഓഹരി വിപണിയിൽ കമ്പനിക്ക് വൻ തിരിച്ചടി. വിപണിയിൽ ലിസ്റ്റ് ചെയ്തതിന് ശേഷം ഓഹരി വിലയിലുണ്ടായ കുത്തനെയുള്ള ഇടിവ് മൂലം കമ്പനിയുടെ വിപണി മൂല്യത്തിൽ നിന്ന് ഒരു ട്രില്യൺ ഡോളറിലധികം തുടച്ചുനീക്കപ്പെട്ടു. എന്നാൽ ഈ തകർച്ച വിപണിയിലെ ഷോർട്ട് സെല്ലർമാർക്ക് വൻ നേട്ടമായി മാറി. സാമ്പത്തിക വിപണി ഡാറ്റ ദാതാവായ എസ് 3 പാർട്ണേഴ്സിന്റെ കണക്കുകൾ പ്രകാരം, സ്പേസ് എക്സ് ഓഹരികൾ വിറ്റഴിച്ചതിലൂടെ ഷോർട്ട് സെല്ലർമാർ നിലവിൽ ഏകദേശം 5 ബില്യൺ ഡോളറിന്റെ പേപ്പർ ലാഭത്തിലാണ്.
കമ്പനിയുടെ ആകെ ഓഹരികളുടെ 30 ശതമാനത്തോളം ഏകദേശം 192 ദശലക്ഷം ഓഹരികൾ ഷോർട്ട് സെല്ലർമാർ വിറ്റഴിച്ചതായാണ് കണക്കാക്കുന്നത്. ജൂൺ 12-ലെ ഐപിഒയ്ക്ക് ശേഷം മൂന്നാം ദിവസമായ ജൂൺ 16-ൽ സ്പേസ് എക്സിന്റെ വിപണി മൂല്യം 2.64 ട്രില്യൺ ഡോളറിലെത്തിയിരുന്നു. എന്നാൽ ജൂലൈ 17 വെള്ളിയാഴ്ച ഓഹരി വില 5.4% ഇടിഞ്ഞ് 123.99 ഡോളറായതോടെ വിപണി മൂല്യം 1.63 ട്രില്യൺ ഡോളറായി ചുരുങ്ങി.
അതായത്, എക്കാലത്തെയും ഉയർന്ന നിരക്കിൽ നിന്ന് ഒരു ട്രില്യൺ ഡോളറിലധികം മൂല്യമാണ് കമ്പനിക്ക് നഷ്ടമായത്. ഇതോടെ ഐപിഒ വിലയായ 135 ഡോളറിനും താഴേക്ക് ഓഹരി വില കൂപ്പുകുത്തി. എഞ്ചിൻ തകരാർ മൂലം കമ്പനിയുടെ ‘സ്റ്റാർഷിപ്പ്’ റോക്കറ്റ് വിക്ഷേപണം താൽക്കാലികമായി നിർത്തിവച്ചതാണ് ജൂലൈ 17 വെള്ളിയാഴ്ചത്തെ പെട്ടെന്നുള്ള ഇടിവിന് കാരണമായത്. ഈ തകർച്ച എലോൺ മസ്കിന്റെ ആകെ ആസ്തി 900 ബില്യൺ ഡോളറിന് താഴെയാകാനും കാരണമായി.
