By പ്രമുഖ സ്മാർട്ട്ഫോൺ ബ്രാൻഡായ ഷവോമി അത്യാധുനിക സാങ്കേതികവിദ്യകളോടെ മൂന്ന് പുതിയ പവർ ബാങ്കുകൾ ഇന്ത്യൻ വിപണിയിൽ പുറത്തിറക്കി. അൾട്രാതിൻ മാഗ്നറ്റിക് പവർ ബാങ്ക് 5000 15W, മാഗ്നറ്റിക് പവർ ബാങ്ക് 10000 45W, പവർ ബാങ്ക് 20000 165W എന്നീ വ്യത്യസ്ത മോഡലുകളാണ് കമ്പനി അവതരിപ്പിച്ചിരിക്കുന്നത്. ഉപഭോക്താക്കളുടെ വിവിധ ആവശ്യങ്ങൾക്ക് അനുയോജ്യമായ രീതിയിൽ തയ്യാറാക്കിയിട്ടുള്ള ഈ പവർ ബാങ്കുകളുടെ വിൽപ്പന വിവിധ ഓൺലൈൻ, ഓഫ്ലൈൻ പ്ലാറ്റ്ഫോമുകൾ വഴി ഈ മാസം പകുതിയോടെ ആരംഭിക്കും.
പുതിയ നിരയിൽ ഏറെ ശ്രദ്ധേയമായ അൾട്രാതിൻ മാഗ്നറ്റിക് പവർ ബാങ്കിന് വെറും 6 മില്ലിമീറ്റർ കനവും 98 ഗ്രാം ഭാരവുമാണുള്ളത്. ഫോണിന്റെ പിൻഭാഗത്ത് കാന്തികമായി എളുപ്പത്തിൽ ഘടിപ്പിക്കാൻ കഴിയുന്ന ഈ മോഡൽ 15W വയർലെസ് ചാർജിംഗും 22.5W വയർഡ് ഫാസ്റ്റ് ചാർജിംഗും പിന്തുണയ്ക്കുന്നു. 5,999 രൂപയാണ് ഇതിന്റെ വിലയെങ്കിലും ലോഞ്ച് ഓഫറിന്റെ ഭാഗമായി 5,499 രൂപയ്ക്ക് ഇത് സ്വന്തമാക്കാം. കൂടാതെ, ക്യുഐ 2.2 (Qi 2.2) വയർലെസ് ചാർജിംഗ് സവിശേഷതയുള്ള 10,000 എംഎഎച്ച് മാഗ്നറ്റിക് പവർ ബാങ്ക് 3,699 രൂപ എന്ന ലോഞ്ച് ഓഫർ വിലയിൽ ലഭ്യമാകും; ഇതിന്റെ യഥാർത്ഥ വില 3,999 രൂപയാണ്.
