By ഇന്ത്യൻ വിദ്യാഭ്യാസ രംഗത്ത് പുതിയ ചരിത്രമെഴുതാൻ തയ്യാറെടുത്ത് കർണാടക സർക്കാർ. വിദ്യാർത്ഥികളെ ആധുനിക സാങ്കേതികവിദ്യയുടെ ലോകത്തേക്ക് കൈപിടിച്ചുയർത്തുന്നതിന്റെ ഭാഗമായി, സ്കൂളുകളിൽ ആറാം ക്ലാസ് മുതൽ ആർട്ടിഫിഷ്യൽ ഇന്റലിജൻസ് വിദ്യാഭ്യാസം നിർബന്ധമാക്കാൻ തീരുമാനിച്ചിരിക്കുന്നു. ‘എഐ അക്ഷര അഭിയാന’, ‘കോഡിംഗ് ഗുരുകുല’ എന്നീ അഭിമാനകരമായ പുതിയ പദ്ധതികളിലൂടെയാണ് കർണാടക ഈ വിദ്യാഭ്യാസ വിപ്ലവത്തിന് തുടക്കമിട്ടിരിക്കുന്നത്.
സംസ്ഥാനത്തെ മുഴുവൻ സ്കൂളുകളിലും ആറാം ക്ലാസ് മുതൽ ആർട്ടിഫിഷ്യൽ ഇന്റലിജൻസും കോഡിംഗും പാഠ്യപദ്ധതിയുടെ ഭാഗമാക്കുമെന്നാണ് ഔദ്യോഗിക പ്രഖ്യാപനം. ഡിജിറ്റൽ യുഗത്തിലെ വെല്ലുവിളികളെ ആത്മവിശ്വാസത്തോടെ നേരിടാനും ആഗോള തലത്തിൽ മറ്റ് വിദ്യാർത്ഥികളുമായി കിടപിടിക്കാൻ കുട്ടികളെ പ്രാപ്തരാക്കാനും ഈ പ്രത്യേക ക്ലാസുകൾ ഏറെ സഹായിക്കും. കുട്ടികൾക്ക് സൗജന്യമായാണ് ‘കോഡിംഗ് ഗുരുകുലത്തിലൂടെ’ പരിശീലനം നൽകുന്നത്. ഇതിലൂടെ ഭാവിയിലെ സാങ്കേതിക വിദഗ്ധരെ വാർത്തെടുക്കാനാണ് സർക്കാർ ലക്ഷ്യമിടുന്നത്.
സ്കൂൾ വിദ്യാഭ്യാസത്തിന് പുറമെ ഉന്നത വിദ്യാഭ്യാസ രംഗത്തും വൻ കുതിച്ചുചാട്ടത്തിനാണ് കർണാടക ഒരുങ്ങുന്നത്. ഇതിന്റെ ഭാഗമായി രാജ്യത്തെ ആദ്യത്തെ സർക്കാർ ഉടമസ്ഥതയിലുള്ള എഐ സർവ്വകലാശാല ബെംഗളൂരുവിൽ സ്ഥാപിക്കുമെന്നും പ്രഖ്യാപനമുണ്ട്. കൂടാതെ, സാങ്കേതിക പരിശീലനവും നവീകരണവും വ്യാപിപ്പിക്കുന്നതിനായി സംസ്ഥാനത്തിന്റെ വിവിധ ഭാഗങ്ങളിൽ ‘എഐ ഹബ്ബുകളും’ ആരംഭിക്കും. വരുംതലമുറയെ 21-ാം നൂറ്റാണ്ടിലെ തൊഴിൽ വിപണിക്ക് അനുയോജ്യമായ രീതിയിൽ സജ്ജമാക്കുകയാണ് ഈ മാതൃകാപരമായ പദ്ധതികളുടെ പ്രധാന ലക്ഷ്യം.
