By ഡെലിവറി പ്രക്രിയ കൂടുതല് സുഗമവും സുരക്ഷിതവുമാക്കുന്നതിനായി ഡെലിവറി അസോസിയേറ്റുകള്ക്കായി പുതിയ എഐ സ്മാര്ട്ട് ഗ്ലാസുകളുടെ മാതൃകയുമായി ആമസോണ്. കമ്പ്യൂട്ടര് വിഷന് സാങ്കേതികവിദ്യയും എഐ സെന്സിംഗ് പ്രവര്ത്തനങ്ങളും ഉള്പ്പെടുന്ന ഈ ഗ്ലാസുകള് ഒരു വെര്ച്വല് അസിസ്റ്റന്റായി പ്രവര്ത്തിക്കും. റിയല്-ടൈം നാവിഗേഷന്, പാക്കേജ് സ്കാനിംഗ്, അപകട മുന്നറിയിപ്പുകള് തുടങ്ങിയ വിവരങ്ങള് ഹെഡ്സ്-അപ്പ് ഡിസ്പ്ലേയില് നല്കുന്നതിലൂടെ ഡെലിവറി ഏജന്റുമാര്ക്ക് മൊബൈല് ഫോണില് നോക്കാതെ തന്നെ ജോലി ചെയ്യാനാകും.
ഡെലിവറി ഏജന്റ് വാഹനം പാര്ക്ക് ചെയ്യുമ്പോള് തന്നെ ഗ്ലാസുകള് ഓട്ടോമാറ്റിക്കായി ആക്ടിവാകുമെന്നും, കൃത്യമായ റൂട്ട് ട്രാക്കിംഗിനായി ജിയോസ്പേഷ്യല് സാങ്കേതികവിദ്യ ഉപയോഗിക്കുമെന്നും ആമസോണ് അറിയിച്ചു. മള്ട്ടി-ക്യാമറ സജ്ജീകരണമുള്ള ഈ ഗ്ലാസുകള്ക്ക് ചുറ്റുമുള്ള പരിസ്ഥിതി, പാക്കേജുകള്, റൂട്ടിലെ അപകടങ്ങള് എന്നിവ കണ്ടെത്താന് കഴിയും. ഒരു ബാര്കോഡ് സ്കാന് ചെയ്യുമ്പോള് പാക്കേജ് കോഡ്, വിലാസം, ഡെലിവറി സ്ഥിരീകരണം എന്നിവ ഡിസ്പ്ലേയില് നേരിട്ട് ദൃശ്യമാകും. ഡെലിവറി വേഷത്തില് ഘടിപ്പിക്കാവുന്ന ഒരു കണ്ട്രോളര്, മാറ്റാവുന്ന ബാറ്ററി, എമര്ജന്സി ബട്ടണ് എന്നിവ ഈ സ്മാര്ട്ട് ഗ്ലാസുകള്ക്കൊപ്പമുണ്ടാകും. കുറഞ്ഞ വെളിച്ചം, വളര്ത്തുമൃഗങ്ങള് തുടങ്ങിയ അപകടങ്ങളെക്കുറിച്ച് മുന്നറിയിപ്പുകള് നല്കാനും തെറ്റായ വിലാസം തിരിച്ചറിയാനുമുള്ള ഫീച്ചറുകള് ഗ്ലാസുകളുടെ ഭാവി പതിപ്പുകളില് ഉള്പ്പെടുത്താനും ആമസോണ് പദ്ധതിയിടുന്നുണ്ട്.
