By ഡിജിറ്റൽ യുഗത്തിൽ ഇന്റർനെറ്റും മൊബൈൽ ഫോണും ദൈനംദിന ജീവിതത്തിന്റെ അവിഭാജ്യ ഘടകമായി മാറിയ സാഹചര്യത്തിൽ, യാതൊരു മുന്നറിയിപ്പുമില്ലാതെ റീചാർജ് നിരക്കുകൾ കുത്തനെ കൂട്ടി ജനങ്ങൾക്ക് മേൽ വലിയ സാമ്പത്തിക ഭാരം അടിച്ചേൽപ്പിച്ചിരിക്കുകയാണ് രാജ്യത്തെ സ്വകാര്യ ടെലികോം കമ്പനികൾ. 15 മുതൽ 25 ശതമാനം വരെ നിരക്കുവർധനവാണ് കമ്പനികൾ നടപ്പാക്കിയിരിക്കുന്നത്. ഇതോടെ പ്രതിദിനം 1.5 ജിബി ഡാറ്റ നൽകിയിരുന്ന ജനപ്രിയ പ്ലാനുകൾക്കെല്ലാം വൻതോതിൽ വില ഉയരുകയും വാർഷിക പ്ലാനുകൾക്ക് 600 രൂപയോളം അധികം നൽകേണ്ട അവസ്ഥ വരികയും ചെയ്തു. 5ജി സേവനങ്ങൾ കൂടുതൽ മെച്ചപ്പെടുത്താനാണ് നിരക്ക് വർധിപ്പിച്ചതെന്നാണ് കമ്പനികളുടെ വാദമെങ്കിലും ഈ നീക്കം സാധാരണക്കാരെ കടുത്ത പ്രതിസന്ധിയിലാക്കിയിരിക്കുകയാണ്.
ടെലികോം മേഖലയിലെ വിരലിലെണ്ണാവുന്ന കോർപ്പറേറ്റ് കുത്തകകളെ സഹായിക്കുന്ന സമീപനമാണ് കേന്ദ്ര സർക്കാർ സ്വീകരിക്കുന്നതെന്ന വിമർശനവും ഇതിനോടകം ശക്തമായിക്കഴിഞ്ഞു. ടെലികോം വിപണി ചുരുക്കം ചില കമ്പനികളുടെ പൂർണ്ണ നിയന്ത്രണത്തിലായതിനാൽ അവർ നിശ്ചയിക്കുന്ന ഉയർന്ന നിരക്കുകൾ നൽകാൻ പൊതുജനം നിർബന്ധിതരാകുകയാണ്. ജനങ്ങളെ നേരിട്ട് ബാധിക്കുന്ന ഈ വിഷയം കടുത്ത പ്രതിഷേധങ്ങൾക്ക് വഴിവെച്ചിട്ടും കേന്ദ്ര സർക്കാരോ ടെലികോം റെഗുലേറ്ററി അതോറിറ്റിയോ (ട്രായ്) വിഷയത്തിൽ ഇടപെടാൻ തയ്യാറാകുന്നില്ലെന്ന ആക്ഷേപം ശക്തമാണ്.
