By ഇന്ത്യയിലെ ഡിജിറ്റൽ വിനോദ വിപണിയിൽ വൻ വളർച്ച രേഖപ്പെടുത്തിക്കൊണ്ട് രാജ്യത്തെ ഒടിടി (OTT) ഉപഭോക്താക്കളുടെ എണ്ണം 66.49 കോടിയായി ഉയർന്നതായി പ്രമുഖ മീഡിയ കൺസൾട്ടിംഗ് സ്ഥാപനമായ ഓർമാക്സ് മീഡിയയുടെ പുതിയ റിപ്പോർട്ട് വ്യക്തമാക്കുന്നു. കഴിഞ്ഞ വർഷത്തെ 60.12 കോടിയിൽ നിന്ന് 11 ശതമാനത്തിന്റെ വളർച്ചയാണ് ഒറ്റ വർഷത്തിനിടെ ഉണ്ടായിരിക്കുന്നത്. രാജ്യത്തെ ജനസംഖ്യയുടെ 45 ശതമാനത്തോളം വരുന്ന വലിയൊരു വിഭാഗം ഇപ്പോൾ ഒടിടി പ്ലാറ്റ്‌ഫോമുകൾ ഉപയോഗിക്കുന്നുണ്ടെന്നാണ് ഇത് സൂചിപ്പിക്കുന്നത്. കൂടാതെ സ്മാർട്ട് ടിവികളും ഇന്റർനെറ്റ് ഉപകരണങ്ങളും ഉപയോഗിച്ച് വലിയ സ്ക്രീനുകളിൽ ഒടിടി കാണുന്നവരുടെ എണ്ണത്തിൽ 60 ശതമാനത്തിന്റെ അവിശ്വസനീയ വർദ്ധനവുണ്ടായി. നിലവിൽ സജീവ കണക്റ്റഡ് ടിവി ഉപഭോക്താക്കളുടെ എണ്ണം 20.69 കോടിയായി ഉയർന്നതോടെ, മുൻപ് ഫോണുകളിൽ മാത്രം കണ്ടിരുന്ന രീതി മാറി ഫോണും ടിവിയും ഒരേപോലെ ഉപയോഗിക്കുന്ന ശീലത്തിലേക്ക് ഉപയോക്താക്കൾ മാറിയെന്നും റിപ്പോർട്ടിൽ പറയുന്നു.
സൗജന്യമായി വീഡിയോകൾ കാണുന്നവർക്ക് പുറമെ, പണം നൽകി സബ്‌സ്‌ക്രിപ്ഷൻ എടുക്കുന്നവരുടെ എണ്ണത്തിലും വലിയ പുരോഗതിയുണ്ടായിട്ടുണ്ട്. ടെലികോം കമ്പനികളുടെ ഡാറ്റാ പ്ലാനുകളും വിവിധ ഒടിടി പ്ലാറ്റ്‌ഫോമുകൾ ഒന്നിച്ചുനൽകുന്ന സംവിധാനങ്ങളും വർദ്ധിച്ചതോടെ പെയ്ഡ് വരിക്കാരുടെ എണ്ണം 16 ശതമാനം ഉയർന്ന് 17.26 കോടിയിലെത്തി. ഡിജിറ്റൽ മാധ്യമങ്ങളുടെ ജനപ്രിയത വ്യക്തമാക്കിക്കൊണ്ട്, ശരാശരി ഒരു ഇന്ത്യൻ ഒടിടി ഉപഭോക്താവ് ആഴ്ചയിൽ ഏകദേശം 14.9 മണിക്കൂർ വരെ വിനോദത്തിനായി മാറ്റിവെക്കുന്നുണ്ടെന്നും സർവേ ഫലങ്ങൾ വ്യക്തമാക്കുന്നു.
