By അമേരിക്കൻ പ്രതിരോധ വകുപ്പിന്റെ 100 മില്യൺ ഡോളർ മൂല്യമുള്ള എഐ ഡ്രോൺ പദ്ധതിയിൽ നിന്ന് ഗൂഗിൾ ഔദ്യോഗികമായി പിന്മാറി. വോയ്സ് കമാൻഡുകൾ ഉപയോഗിച്ച് നിയന്ത്രിക്കാവുന്ന നൂതന ഡ്രോൺ സാങ്കേതികവിദ്യ വികസിപ്പിക്കാനായിരുന്നു ഈ പദ്ധതി ലക്ഷ്യമിട്ടിരുന്നത്. ആദ്യഘട്ടത്തിൽ താൽപ്പര്യം പ്രകടിപ്പിച്ചിരുന്നെങ്കിലും, ആഭ്യന്തര അവലോകനത്തിന് ശേഷം ഗൂഗിൾ ഈ തീരുമാനത്തിൽ നിന്ന് പിന്തിരിയുകയായിരുന്നുവെന്ന് ബ്ലൂംബെർഗ് റിപ്പോർട്ട് ചെയ്യുന്നു. വിഭവങ്ങളുടെ പരിമിതിയാണ് പിന്മാറ്റത്തിന് കാരണമായി കമ്പനി ചൂണ്ടിക്കാട്ടുന്നതെങ്കിലും ഗൂഗിളിനുള്ളിലെ ആഭ്യന്തര തർക്കങ്ങൾ ഇതിന് പിന്നിലുണ്ടെന്ന് സൂചനയുണ്ട്.
ഗൂഗിളിന്റെ ഈ തീരുമാനം ജീവനക്കാർക്കിടയിൽ സമ്മിശ്ര പ്രതികരണങ്ങളാണ് ഉണ്ടാക്കിയിരിക്കുന്നത്. കമ്പനിയുടെ അത്യാധുനിക എഐ സാങ്കേതികവിദ്യ ആയുധങ്ങൾക്കും സൈനിക ആവശ്യങ്ങൾക്കുമായി ഉപയോഗിക്കുന്നതിനെതിരെ നൂറുകണക്കിന് ഗവേഷകർ ശക്തമായ പ്രതിഷേധം ഉയർത്തിയിരുന്നു. ഇതിന് മുൻപ് 2018-ൽ പ്രോജക്റ്റ് മാവൻ എന്ന സൈനിക പദ്ധതിയുമായി സഹകരിച്ചപ്പോഴും ഗൂഗിളിനുള്ളിൽ വലിയ പ്രതിഷേധങ്ങൾ നടക്കുകയും ആയുധങ്ങൾ വികസിപ്പിക്കില്ലെന്ന് കമ്പനി ഉറപ്പുനൽകുകയും ചെയ്തിരുന്നു. നിലവിൽ സൈനിക രഹസ്യ പദ്ധതികളിൽ നേരിട്ട് പങ്കാളികളാകില്ലെന്ന നിലപാടിലാണ് ഗൂഗിൾ എഐ ഗവേഷകർ ഉറച്ചുനിൽക്കുന്നത്.
ലളിതമായ വോയ്സ് കമാൻഡുകൾ വഴി ഡ്രോൺ കൂട്ടങ്ങളെ നിയന്ത്രിക്കാൻ കമാൻഡർമാരെ പ്രാപ്തരാക്കുക എന്നതായിരുന്നു അമേരിക്കയുടെ ഈ ചലഞ്ച്. നിലവിൽ ഓപ്പൺഎഐ, പാലന്റിയർ, xAI തുടങ്ങിയ പ്രമുഖ കമ്പനികൾ ഈ മത്സരരംഗത്ത് സജീവമാണ്. എന്നാൽ ആയുധ സംവിധാനങ്ങളിൽ എഐ ഉപയോഗിക്കുന്നതുമായി ബന്ധപ്പെട്ട തർക്കങ്ങൾ മൂലം ആന്ത്രോപിക് എന്ന കമ്പനിയെ ഇതിൽ നിന്നും ഒഴിവാക്കിയിരുന്നു. ഗൂഗിൾ പിന്മാറിയതോടെ, സായുധ പോരാട്ടങ്ങളിൽ കൃത്രിമബുദ്ധിയുടെ പങ്കിനെക്കുറിച്ചും സാങ്കേതിക ഭീമന്മാരുടെ ധാർമ്മിക ഉത്തരവാദിത്തങ്ങളെക്കുറിച്ചുമുള്ള ചർച്ചകൾ വീണ്ടും സജീവമായിരിക്കുകയാണ്.
