By ആപ്പിളിന്റെ വരാനിരിക്കുന്ന ഐഒഎസ് 27 ഒപ്പറേറ്റിംഗ് സിസ്റ്റത്തിൽ സിരിക്ക് വൻ പരിഷ്കാരങ്ങൾ വരുത്താൻ കമ്പനി ഒരുങ്ങുന്നതായി റിപ്പോർട്ടുകൾ വ്യക്തമാക്കുന്നു. ഇതിൽ ഏറ്റവും പ്രധാനപ്പെട്ടത് സിരിക്ക് മാത്രമായി ഒരു ‘സ്റ്റാൻഡ്-എലോൺ ആപ്പ്’ അവതരിപ്പിച്ചേക്കുമെന്നതാണ്. കുപെർട്ടിനോ ആസ്ഥാനമായുള്ള ടെക് ഭീമനായ ആപ്പിൾ, തങ്ങളുടെ വാർഷിക ഡെവലപ്പർ കോൺഫറൻസായ WWDC 2026-ൽ ഐഫോണിനായുള്ള ഈ പുതിയ ഒഎസ് അനാച്ഛാദനം ചെയ്യുമെന്നാണ് പ്രതീക്ഷിക്കുന്നത്.
പ്രമുഖ മാധ്യമപ്രവർത്തകനായ മാർക്ക് ഗുർമാന്റെ ‘പവർ ഓൺ’ വാർത്താക്കുറിപ്പ് അനുസരിച്ച്, ആപ്പിളിന്റെ പുതിയ AI തന്ത്രത്തിന്റെ പ്രധാന അടിത്തറ ‘സ്വകാര്യത’ ആയിരിക്കും. ഇതിന്റെ ഭാഗമായി ചാറ്റുകൾ സ്വയമേവ ഇല്ലാതാകുന്ന ‘ഓട്ടോമാറ്റിക് ചാറ്റ് ഡിലീഷൻ’ ഫീച്ചറും സിരിയിൽ ഉൾപ്പെടുത്തിയേക്കും.
പുതിയ സ്റ്റാൻഡ്-എലോൺ സിരി ആപ്പ് ചാറ്റ്ജിപിടി, ക്ലോഡ് എന്നിവ പോലെ മുൻകാല സംഭാഷണങ്ങൾ സൂക്ഷിച്ചുവെക്കുന്ന ഒരു ചാറ്റ്ബോട്ട് രൂപത്തിലാകും പ്രവർത്തിക്കുക. സ്ക്രീനിന്റെ മുകളിൽ നിന്ന് താഴേക്ക് സ്വൈപ്പ് ചെയ്ത് ലഭിക്കുന്ന “സെർച്ച് അല്ലെങ്കിൽ ആസ്ക്” മോഡ് വഴിയും ഉപയോക്താക്കൾക്ക് ഈ ചാറ്റ് അനുഭവം ആക്സസ് ചെയ്യാം. മെസേജസ് ആപ്പിലുള്ളതിന് സമാനമായി, സിരിയുമായുള്ള സംഭാഷണങ്ങൾ 30 ദിവസത്തിന് ശേഷമോ ഒരു വർഷത്തിന് ശേഷമോ സ്വയമേവ ഇല്ലാതാക്കാൻ ഉപയോക്താക്കൾക്ക് സാധിക്കും. വേണമെങ്കിൽ ചാറ്റുകൾ സ്ഥിരമായി സൂക്ഷിക്കാനുള്ള ഓപ്ഷനും ഇതിലുണ്ടാകും.
