By ദേശീയ സുരക്ഷ മുൻനിർത്തി ചൈനീസ് വീഡിയോ സർവൈലൻസ് കമ്പനികളായ ഹിക്വിഷൻ, ദഹുവ, ടിപി-ലിങ്ക് തുടങ്ങിയവയ്ക്ക് ഇന്ത്യയിൽ നിയന്ത്രണം വരുന്നു. ഏപ്രിൽ ഒന്ന് മുതൽ പ്രാബല്യത്തിൽ വന്ന പുതിയ സ്റ്റാൻഡേർഡൈസേഷൻ ടെസ്റ്റിംഗ് ആൻഡ് ക്വാളിറ്റി സർട്ടിഫിക്കേഷൻ ചട്ടങ്ങൾ പ്രകാരം, നിശ്ചിത സുരക്ഷാ മാനദണ്ഡങ്ങൾ പാലിക്കാത്ത ഇന്റർനെറ്റ് കണക്റ്റഡ് സിസിടിവി ക്യാമറകളുടെ വില്പന നിരോധിക്കപ്പെടും. ഇന്ത്യയിൽ ഇത്തരം ഉൽപ്പന്നങ്ങൾ വിൽക്കുന്നതിന് മുൻകൂട്ടിയുള്ള ഔദ്യോഗിക അനുമതി ഇനി മുതൽ നിർബന്ധമാണ്.
കണക്റ്റഡ് ഉപകരണങ്ങളുടെ സുരക്ഷാ മാനദണ്ഡങ്ങൾ ശക്തിപ്പെടുത്തുന്നതിന്റെ ഭാഗമായി ഇലക്ട്രോണിക്സ് ആൻഡ് ഐടി മന്ത്രാലയമാണ് ഈ നീക്കം നടപ്പിലാക്കുന്നത്. ചൈനീസ് ഉറവിടമുള്ള ചിപ്സെറ്റുകൾ ഉപയോഗിക്കുന്ന ഉപകരണങ്ങൾക്കും സുരക്ഷാ ആശങ്കകളുള്ള കമ്പനികൾക്കും പുതിയ സർട്ടിഫിക്കേഷൻ നൽകുന്നതിൽ അധികൃതർ കർശനമായ നിലപാടാണ് സ്വീകരിക്കുന്നത്. ഡാറ്റാ ചോർച്ചയും അനധികൃത റിമോട്ട് ആക്സസും തടയാൻ ലക്ഷ്യമിട്ടുള്ള ഈ പരിശോധനകളിൽ പരാജയപ്പെടുന്ന ഉൽപ്പന്നങ്ങൾക്ക് ഇന്ത്യൻ വിപണിയിൽ പ്രവേശനം അനുവദിക്കില്ല.
മുമ്പ് ഇന്ത്യൻ സിസിടിവി വിപണിയുടെ മൂന്നിലൊന്ന് കൈവശം വച്ചിരുന്ന ചൈനീസ് ബ്രാൻഡുകൾക്ക് ഈ തീരുമാനം വലിയ തിരിച്ചടിയാകും. എന്നാൽ ഈ വിടവ് നികത്താൻ ഇന്ത്യൻ കമ്പനികൾ ഇതിനോടകം തന്നെ സജ്ജമായിക്കഴിഞ്ഞു. സിപി പ്ലസ്, ക്യൂബോ, പ്രമ, മാട്രിക്സ് തുടങ്ങിയ ആഭ്യന്തര ബ്രാൻഡുകൾ ചൈനീസ് ഘടകങ്ങൾ ഒഴിവാക്കി തായ്വാൻ ചിപ്സെറ്റുകളും സ്വന്തം ഫേംവെയറുകളും ഉപയോഗിച്ച് ഉൽപ്പാദനം വർദ്ധിപ്പിച്ചിട്ടുണ്ട്. നിലവിൽ ഇന്ത്യൻ വിപണിയുടെ 80 ശതമാനത്തിലധികം ആഭ്യന്തര കമ്പനികൾ കീഴടക്കിയതായാണ് കണക്കുകൾ സൂചിപ്പിക്കുന്നത്.
2024-ൽ അവതരിപ്പിച്ച എസൻഷ്യൽ റിക്വയർമെന്റ്സ് മാനദണ്ഡങ്ങൾ പ്രകാരം, ക്യാമറകളിൽ ഉപയോഗിക്കുന്ന സിസ്റ്റം ഓൺ ചിപ്പ് പോലുള്ള പ്രധാന ഘടകങ്ങളുടെ ഉറവിടം നിർമ്മാതാക്കൾ വെളിപ്പെടുത്തേണ്ടതുണ്ട്. ഈ ചട്ടങ്ങൾ പാലിക്കാൻ കമ്പനികൾക്ക് നൽകിയിരുന്ന രണ്ട് വർഷത്തെ സാവകാശം അവസാനിച്ചതോടെയാണ് നടപടികൾ കടുപ്പിച്ചത്. ഇതുവരെ 500-ലധികം സിസിടിവി മോഡലുകൾ പുതിയ സുരക്ഷാ മാനദണ്ഡങ്ങൾ പാലിച്ച് സർട്ടിഫിക്കേഷൻ നേടിയിട്ടുണ്ട്. വരും ദിവസങ്ങളിൽ സുരക്ഷിതമായ നിരീക്ഷണ സംവിധാനങ്ങൾ ഉറപ്പാക്കാൻ ഈ നീക്കം സഹായിക്കും.
