By വെറുമൊരു ചാറ്റ്ബോട്ട് എന്ന നിലയിൽ നിന്നും മാറി, മനുഷ്യന്റെ ഇടപെടലില്ലാതെ തന്നെ സ്വയം ജോലികൾ ചെയ്യാൻ കഴിയുന്ന എഐ ഏജന്റുകളെ അവതരിപ്പിക്കാൻ ഓപ്പൺഎഐ ഒരുങ്ങുന്നു. സാം ആൾട്ട്മാന്റെ നേതൃത്വത്തിലുള്ള കമ്പനി ‘ഹെർമെസ്’ എന്ന കോഡ് നെയിമിലാണ് ഈ വിപ്ലവകരമായ മാറ്റത്തിന് പിന്നിൽ പ്രവർത്തിക്കുന്നത്.
നിലവിൽ നമ്മൾ നൽകുന്ന നിർദ്ദേശങ്ങൾക്ക് മറുപടി നൽകുക മാത്രമാണ് ചാറ്റ്ജിപിടി ചെയ്യുന്നത്. എന്നാൽ പുതിയ സംവിധാനം വരുന്നതോടെ, ഉപയോക്താക്കൾ ഓരോ തവണയും നിർദ്ദേശങ്ങൾ നൽകേണ്ടതില്ല. നിങ്ങൾക്ക് വേണ്ടി 24 മണിക്കൂറും പ്രവർത്തിക്കുന്ന സ്വന്തം എഐ ഏജന്റുകളെ സൃഷ്ടിക്കാം. ഇമെയിലുകൾ പരിശോധിക്കുക, റിപ്പോർട്ടുകൾ തയ്യാറാക്കുക, ദൈനംദിന കാര്യങ്ങൾ ഷെഡ്യൂൾ ചെയ്യുക തുടങ്ങിയ ജോലികൾ ഇവ സ്വയം നിർവ്വഹിക്കും. സാങ്കേതിക പരിജ്ഞാനം ഇല്ലാത്തവർക്കും എളുപ്പത്തിൽ എഐ ഏജന്റുകളെ നിർമ്മിക്കാനും നിയന്ത്രിക്കാനും കഴിയുന്ന ഇന്റർഫേസ് ഇതിലുണ്ടാകും.
സ്ലാക്ക് പോലുള്ള പ്ലാറ്റ്ഫോമുകളുമായി ചേർന്ന് പ്രവർത്തിക്കുന്നതിലൂടെ ടീം വർക്കുകൾ വേഗത്തിലാക്കാൻ സാധിക്കും. ഉപയോഗിക്കുന്ന ആളുടെ ശീലങ്ങൾ മനസ്സിലാക്കി കൂടുതൽ വ്യക്തിഗതമായ സേവനം നൽകാൻ ഈ ഏജന്റുകൾക്ക് കഴിയും. ഇതിനൊപ്പം ഓഡിയോ സമ്മറി, പേഴ്സണൽ കസ്റ്റമൈസേഷൻ എന്നീ ഫീച്ചറുകളും വികസിപ്പിക്കുന്നുണ്ടെന്നാണ് റിപ്പോർട്ട്. എഐയുടെ ഈ പുതിയ ചുവടുവെപ്പ് ഉൽപ്പാദനക്ഷമത വർദ്ധിപ്പിക്കുമെങ്കിലും, സാധാരണ ഓഫീസ് ജോലികളെ ഇത് എങ്ങനെ ബാധിക്കുമെന്ന ആശങ്കയും സാങ്കേതിക ലോകത്ത് ഉയരുന്നുണ്ട്.
