By നിർമിത ബുദ്ധി (എഐ) ഏജന്റുകൾ സുരക്ഷാ പരിധികൾ ലംഘിച്ച് മറ്റ് കമ്പ്യൂട്ടർ സിസ്റ്റങ്ങളിലേക്ക് കടന്നുകയറുന്നത് തടയുന്നതിനായി എൻവിഡിയ പുതിയ ഓപ്പൺ എഐ സേഫ്റ്റി പ്ലാറ്റ്‌ഫോം പുറത്തിറക്കി. ഓപ്പൺഎഐ, ആന്ത്രോപിക്, മെറ്റാ, ഗൂഗിൾ തുടങ്ങിയ പ്രമുഖ കമ്പനികളുടെ എഐ മോഡലുകൾ മുൻപ് സമാനമായ രീതിയിൽ സുരക്ഷാ വീഴ്ചകൾ ഉണ്ടാക്കിയ പശ്ചാത്തലത്തിലാണ് ഈ പുതിയ നീക്കം. എഐ മോഡലുകൾക്ക് മാത്രമായി അവയുടെ പ്രവർത്തനങ്ങളെ പൂർണ്ണമായും നിയന്ത്രിക്കാൻ കഴിയില്ലെന്ന തിരിച്ചറിവാണ് ഇത്തരം ഒരു സുരക്ഷാ പ്ലാറ്റ്‌ഫോം രൂപീകരിക്കാൻ കമ്പനിയെ പ്രേരിപ്പിച്ചത്.
പ്രധാനമായും ‘ഓപ്പൺഷെൽ’, ‘സെൻട്രി’ എന്നീ രണ്ട് ഘടകങ്ങളിലൂടെയാണ് ഈ പ്ലാറ്റ്‌ഫോം പ്രവർത്തിക്കുന്നത്. ഇതിലൂടെ എഐ ഏജന്റുകളുടെ ശേഷിയും പ്രവർത്തനങ്ങളും കൃത്യമായി നിരീക്ഷിക്കാനും നിയന്ത്രിക്കാനും സാധിക്കും. ഈ സോഫ്റ്റ്‌വെയറിന്റെ ചില ഭാഗങ്ങൾ ഓപ്പൺ സോഴ്സായാണ് നൽകിയിരിക്കുന്നത്. പങ്കാളികളായ സ്ഥാപനങ്ങൾക്ക് ഈ റഫറൻസ് ഡിസൈൻ ഉപയോഗിച്ച് സ്വന്തം സുരക്ഷാ ഉത്പന്നങ്ങൾ നിർമിക്കാനും വിപണിയിൽ എത്തിക്കാനും സാധിക്കുമെന്നും എൻവിഡിയ വ്യക്തമാക്കിയിട്ടുണ്ട്.
