By കുട്ടികളുടെ ഫോണുകളിലും മറ്റ് ഡിജിറ്റൽ ഉപകരണങ്ങളിലും നഗ്നചിത്രങ്ങൾ പൂർണ്ണമായി നിരോധിക്കാൻ ആവശ്യമായ നടപടികൾ സ്വീകരിക്കണമെന്ന് ആപ്പിളിനോടും ഗൂഗിളിനോടും ബ്രിട്ടൻ ആവശ്യപ്പെട്ടു. ലണ്ടൻ ടെക് വീക്കിൽ സംസാരിക്കവെ ബ്രിട്ടീഷ് പ്രധാനമന്ത്രി കെയർ സ്റ്റാർമറാണ് കമ്പനികൾക്ക് ഈ കർശന നിർദ്ദേശം നൽകിയത്. 18 വയസ്സിന് താഴെയുള്ള കുട്ടികൾ ഫോണിലൂടെ നഗ്നചിത്രങ്ങൾ എടുക്കുന്നതും, അയക്കുന്നതും, കാണുന്നതും തടയാൻ ആവശ്യമായ സോഫ്റ്റ്വെയർ അപ്ഡേറ്റുകളോ ഇൻ-ബിൽറ്റ് ഫീച്ചറുകളോ കമ്പനികൾ ഒരുക്കണം. മൂന്ന് മാസത്തിനകം കമ്പനികൾ സ്വമേധയാ ഇത് നടപ്പാക്കിയില്ലെങ്കിൽ കർശനമായ നിയമനിർമ്മാണത്തിലൂടെ ഇതിന് നിർബന്ധിതരാക്കുമെന്നും, നിയമം ലംഘിക്കുന്നവർക്കെതിരെ വലിയ പിഴ ഉൾപ്പെടെയുള്ള നിയമനടപടികൾ സ്വീകരിക്കുമെന്നും പ്രധാനമന്ത്രി മുന്നറിയിപ്പ് നൽകി.
ബ്രിട്ടനിൽ നിലവിലുള്ളതും പുതുതായി വിൽക്കുന്നതുമായ എല്ലാ സ്മാർട്ട്ഫോണുകൾക്കും ടാബ്ലെറ്റുകൾക്കും ഈ നിയമം ബാധകമായിരിക്കും. ഓപ്പറേറ്റിംഗ് സിസ്റ്റം നിർമ്മിക്കുന്ന കമ്പനികൾക്ക് പുറമെ, ഫോൺ വിതരണം ചെയ്യുന്ന റീട്ടെയിലർമാരും ഈ നിയമത്തിന്റെ പരിധിയിൽ വരും. എന്നാൽ, മുതിർന്നവരുടെ ഫോണുകളെയോ അവരുടെ സ്വകാര്യതയെയോ ഈ പുതിയ നിയന്ത്രണം യാതൊരു തരത്തിലും ബാധിക്കില്ലെന്ന് പ്രധാനമന്ത്രി വ്യക്തമാക്കിയിട്ടുണ്ട്. ലോകത്തിലെ ഏറ്റവും പ്രമുഖ സാങ്കേതിക കമ്പനികൾക്ക് പരിഹരിക്കാൻ കഴിയുന്ന ഒരു വെല്ലുവിളി മാത്രമാണിതെന്നും അദ്ദേഹം കൂട്ടിച്ചേർത്തു.
ബ്രിട്ടന്റെ ഈ കർശന നിലപാടിനോട് സാങ്കേതിക കമ്പനികൾ അനുകൂലമായാണ് പ്രതികരിച്ചത്. കുട്ടികളുടെ ഓൺലൈൻ സുരക്ഷ ഉറപ്പാക്കുന്നതിൽ തങ്ങൾ പ്രതിബദ്ധരാണെന്നും, സ്വകാര്യത മാനിച്ചുകൊണ്ട് തന്നെ ഇതിന് ഫലപ്രദമായ പരിഹാരം കണ്ടെത്തുമെന്നും ഗൂഗിൾ വക്താവ് അറിയിച്ചു. തങ്ങളുടെ ഐമെസേജ്, എയർഡ്രോപ്പ്, ഫേസ്ടൈം തുടങ്ങിയ സേവനങ്ങളിൽ നഗ്നചിത്രങ്ങൾ കൈമാറുന്നത് തടയുന്ന ‘കമ്മ്യൂണിക്കേഷൻ സേഫ്റ്റി’ ഫീച്ചർ നിലവിലുണ്ടെന്നും ചൈൽഡ് അക്കൗണ്ടുകളിൽ ഇത് മുൻകൂട്ടി ഓൺ ചെയ്തിട്ടുണ്ടെന്നും ആപ്പിളും വ്യക്തമാക്കി. ഓൺലൈൻ പ്ലാറ്റ്ഫോമുകളെ നിയന്ത്രിക്കാനായി മീഡിയ റെഗുലേറ്ററായ ‘ഓഫ്കോം’ വഴി ‘ഓൺലൈൻ സേഫ്റ്റി ആക്ട്’ ഉൾപ്പെടെയുള്ള ശക്തമായ നിയമങ്ങൾ ബ്രിട്ടൻ ഇതിനകം തന്നെ നടപ്പിലാക്കിയിട്ടുണ്ട്.
