By ഗാലക്സി S26 സ്മാർട്ട്ഫോണുകൾക്ക് പിന്നാലെ 2026-ൽ വിപ്ലവകരമായ എആർ സ്മാർട്ട് ഗ്ലാസുകൾ വിപണിയിലിറക്കാൻ സാംസങ് തയ്യാറെടുക്കുന്നു. ഫോണുകൾക്കപ്പുറത്തേക്ക് സാങ്കേതികവിദ്യ വ്യാപിപ്പിക്കുന്നതിന്റെ ഭാഗമായാണ് മെറ്റാ റേ-ബാൻ ഗ്ലാസുകളോട് മത്സരിക്കാൻ സാംസങ് സ്വന്തം പതിപ്പ് പുറത്തിറക്കുന്നത്. ഈ വർഷം തന്നെ ഉൽപ്പന്നം ലോഞ്ച് ചെയ്യുമെന്ന് കമ്പനി സ്ഥിരീകരിച്ചിട്ടുണ്ടെങ്കിലും കൃത്യമായ തീയതി വെളിപ്പെടുത്തിയിട്ടില്ല.
പുതിയ എആർ ഗ്ലാസുകളിലൂടെ മൾട്ടിമോഡൽ എഐ അനുഭവങ്ങൾ നൽകാനാണ് സാംസങ് ലക്ഷ്യമിടുന്നത്. ആദ്യ ഘട്ടത്തിൽ ഇതിൽ പ്രത്യേക ഡിസ്പ്ലേ ഉണ്ടാകാൻ സാധ്യതയില്ലെന്നും പകരം സ്മാർട്ട്ഫോണുമായി ബന്ധിപ്പിച്ചു പ്രവർത്തിക്കുന്ന ഒരു സെക്കൻഡറി ഉപകരണമായിരിക്കുമിതെന്നും റിപ്പോർട്ടുകൾ സൂചിപ്പിക്കുന്നു. ഗൂഗിളിന്റെ ആൻഡ്രോയിഡ് XR പ്ലാറ്റ്ഫോമിലായിരിക്കും ഇത് പ്രവർത്തിക്കുക. ഇതിലൂടെ ജെമിനി എഐ സേവനങ്ങളും മറ്റ് ആൻഡ്രോയിഡ് ആപ്പുകളും തടസ്സമില്ലാതെ ഉപയോഗിക്കാൻ സാധിക്കും.
ഫോട്ടോകൾ എടുക്കാനും വീഡിയോകൾ റെക്കോർഡ് ചെയ്യാനും സംഗീതം കേൾക്കാനും കോളുകൾ വിളിക്കാനും ഈ ഗ്ലാസുകൾ സഹായിക്കും. സാംസങ്ങിന്റെ ഗാലക്സി ഇക്കോസിസ്റ്റത്തിൽ ഈ ഉപകരണം ഒരു പ്രധാന പങ്ക് വഹിക്കുമെന്നാണ് കരുതപ്പെടുന്നത്. എഐ സാങ്കേതികവിദ്യയുടെ സഹായത്തോടെ സന്ദേശങ്ങൾ വായിക്കാനും വിവർത്തനം ചെയ്യാനും സഹായിക്കുന്ന ഫീച്ചറുകളും ഇതിൽ ഉൾപ്പെട്ടേക്കാം.
