By ബിഗ് ബോസ് മലയാളം സീസണ്‍ 7 ന്‍റെ ഗ്രാന്‍ഡ് ലോഞ്ച് തീയതി പ്രഖ്യാപിച്ച് ഏഷ്യാനെറ്റ്. ഇന്ത്യന്‍ ടെലിവിഷനില്‍ ഏറ്റവുമധികം കാഴ്ചക്കാരുള്ള റിയാലിറ്റി ഷോയുടെ മലയാളം പതിപ്പിന്‍റെ പുതിയ സീസണ്‍ ഓഗസ്റ്റ് 3 ന് ആരംഭിക്കും. അന്ന് വൈകിട്ട് 7 മണി മുതല്‍ ഏഷ്യാനെറ്റിലും ജിയോ ഹോട്ട്സ്റ്റാറിലും സീസണ്‍ കാണാനാവും.
കഴിഞ്ഞ സീസണുകളുടെ വ്യത്യസ്തമായിട്ടായിരുന്നു സീസണ്‍ 7 ന്‍റെ പരസ്യങ്ങളും ലോഞ്ച് ഡേറ്റ് പ്രഖ്യാപിച്ചതും. നേരത്തെ പുറത്തെത്തി വലിയ പ്രേക്ഷകശ്രദ്ധ നേടിയ പ്രൊമോ വീ‍ഡിയോയുടെ ബിഹൈന്‍ഡ് ദി സീന്‍സ് വീഡിയോയിലാണ് ലോഞ്ച് തീയതി പ്രഖ്യാപിച്ചത്. 1.25 മിനിറ്റ് ദൈര്‍ഘ്യമാണ് വീഡിയോയ്ക്ക് ഉള്ളത്.
ഏഴിന്‍റെ പണി വരുന്നു എന്ന ക്യാപ്ഷനോടെയാണ് മോഹന്‍ലാല്‍ അഭിനയിച്ച പ്രൊമോ വീഡിയോ നേരത്തെ എത്തിയത്. ബിഗ് ബോസ് ഷോകളില്‍ മത്സരാര്‍ഥികള്‍ സാധാരണ ഇറക്കാറുള്ള പലതരം കാര്‍ഡുകള്‍ ഇത്തവണ അനുവദിക്കില്ലെന്നാണ് അവതാരകനായ മോഹന്‍ലാല്‍ പ്രൊമോ വീഡിയോയില്‍ പറഞ്ഞത്. ഫേക്ക് കാര്‍ഡ്, സേഫ് കാര്‍ഡ്, സോപ്പിംഗ് കാര്‍ഡ്, നന്മ കാര്‍ഡ്, ഒളിക്കല്‍ കാര്‍ഡ്, പ്രിപ്പയര്‍ കാര്‍ഡ്, വിക്റ്റിം കാര്‍ഡ് എന്നിവയൊന്നും ഇനി ഈ ടേബിളില്‍ ഇറക്കി കളിക്കരുത്, കീറിപ്പോകും എന്നാണ് പ്രൊമോയില്‍ മോഹന്‍ലാൽ പറയുന്നത്.
സംവിധായകനും നടനുമായ മൃദുല്‍ നായര്‍ ആയിരുന്നു പ്രൊമോയുടെ സംവിധാനം. പ്രശസ്ത ഛായാഗ്രാഹകന്‍ കെ യു മോഹനന്‍ ആണ് വീഡിയോ ചിത്രീകരിച്ചത്.
