By സാങ്കേതികവിദ്യയുടെ പുതിയ കാലഘട്ടത്തില് അസാധ്യമെന്നു തോന്നുന്ന കാര്യങ്ങള് പോലും സാധ്യമാകുകയാണ്. ബോസില് നിന്ന് തുടര്ച്ചയായി എത്തുന്ന വാട്സ്ആപ്പ് സന്ദേശങ്ങള് കാരണം മാനസികമായി തളരുന്ന പ്രൊഫഷണലുകള്ക്കായി ഒരു ഇന്ത്യന് ടെക്കി കണ്ടെത്തിയ പരിഹാരമാണ് ഇപ്പോള് സോഷ്യല് മീഡിയയില് വൈറലാകുന്നത്.
ഡെവലപ്പര് കൂടിയായ ഈ ടെക്കി, റെഡിറ്റിലൂടെയാണ് തന്റെ നൂതന ആശയം പങ്കുവച്ചത്. വാട്സ്നോട്ട് (WhatsNot) എന്ന പേരിലുള്ള ഈ എഐ ടൂള്, വാട്സ്ആപ്പ് സന്ദേശങ്ങള് തുറക്കാതെ തന്നെ അവയുടെ ഉള്ളടക്കം മനസിലാക്കാന് സഹായിക്കുന്നതാണ്. ഏറ്റവും പ്രധാനമായി, സന്ദേശം വായിച്ചതായി അയച്ചയാള്ക്ക് അറിയിക്കാതെ, അഥവാ ബ്ലൂ ടിക്ക് കാണിക്കാതെയാണ് ഈ ടൂള് പ്രവര്ത്തിക്കുന്നത്. ഡെവലപ്പര് പങ്കിട്ട ഈ നൂതന ടൂള് പ്രൊഫഷണലുകള്ക്കിടയില് വൈറലായി മാറിയിരിക്കുകയാണ്.
തന്റെ ബോസ് പലപ്പോഴും വാട്സ്ആപ്പില് ദൈര്ഘ്യമേറിയ സന്ദേശങ്ങള് അയയ്ക്കാറുണ്ടെന്നും, ഓരോ തവണയും അവ തുറന്ന് വായിക്കുന്നത് ക്ഷീണകരമായി തോന്നുന്നുവെന്നും ഡെവലപ്പര് പറയുന്നു. അതിനാല് ചാറ്റുകള് മ്യൂട്ട് ചെയ്യുകയോ പൂര്ണമായി അവഗണിക്കുകയോ ചെയ്യുന്നതിനുപകരം, ഒരു സാങ്കേതിക പരിഹാരം കണ്ടെത്താന് അദ്ദേഹം തീരുമാനിച്ചു. അതിന്റെ ഫലമാണ് വാട്സ്നോട്ട്.
ഈ എഐ ടൂളിന്റെ ഏറ്റവും വലിയ സവിശേഷത സന്ദേശം വായിച്ചാലും ബ്ലൂ ടിക്ക് ദൃശ്യമാകില്ല എന്നതാണ്. ദൈര്ഘ്യമേറിയ വാട്സ്ആപ്പ് സന്ദേശങ്ങള് വായിച്ച്, അവയെ ഹ്രസ്വവും വ്യക്തവുമായ ഒരു സമ്മറിയാക്കി മാറ്റാന് വാട്സ്നോട്ടിന് കഴിയും. സന്ദേശത്തിന്റെ ടോണ്, അത് അടിയന്തിരമാണോ, കര്ശനമാണോ, സാധാരണ വിവരണമാത്രമാണോ എന്നതും ടൂള് തിരിച്ചറിയുന്നു. ഇതിലൂടെ അയച്ചയാളുടെ മാനസികാവസ്ഥ വരെ ഏകദേശമായി മനസിലാക്കാന് സാധിക്കും.
