By ഡിടിഎച്ച് ഓപ്പറേറ്ററുടെ സബ്സ്ക്രൈബര് ബേസിന്റെ സമഗ്ര ഓഡിറ്റ് ആവശ്യപ്പെട്ട് കള്വര് മാക്സ് എന്റര്ടൈന്മെന്റ് പ്രൈവറ്റ് ലിമിറ്റഡ് (സോണി പിക്ചേഴ്സ് നെറ്റ്വര്ക്ക്സ് ഇന്ത്യ) സമര്പ്പിച്ച ഹര്ജിയില് ടെലികോം തര്ക്ക പരിഹാര, അപ്പലേറ്റ് ട്രൈബ്യൂണല് (ടിഡിഎസ്എടി) ടാറ്റ പ്ലേയ്ക്ക് നോട്ടീസ് അയച്ചു. ടാറ്റ പ്ലേയുടെ അഭിഭാഷകന് കൂടുതല് സമയം ആവശ്യപ്പെട്ടതിനെത്തുടര്ന്ന് ചെയര്പേഴ്സണ് ജസ്റ്റിസ് ധീരുഭായ് നരന്ഭായ് പട്ടേലും അംഗം ജസ്റ്റിസ് സുബോധ് കുമാര് ഗുപ്തയും അധ്യക്ഷരായ ഡിവിഷന് ബെഞ്ച് കേസ് സെപ്റ്റംബര് 16 ലേക്ക് മാറ്റിവച്ചു.
കഴിഞ്ഞ മെയ് മാസത്തില് ടാറ്റ പ്ലേ അതിന്റെ 106 സബ്സ്ക്രിപ്ഷന് പാക്കുകളില് നിന്ന് 25 സോണി ചാനലുകള് മുന്കൂര് അറിയിപ്പില്ലാതെ നീക്കം ചെയ്തതിനെ തുടര്ന്ന് ദശലക്ഷക്കണക്കിന് സബ്സ്ക്രൈബര്മാരെ കള്വര് മാക്സിന്റെ വിവിധ പ്രോഗ്രാമുകള് ആക്സസ് ചെയ്യുന്നതിന് തടസം നേരിട്ടിരുന്നു. മാത്രമല്ല ഏഷ്യാ കപ്പ് ഉള്പ്പടെയുള്ള വ്യത്യസ്ത പ്രോഗ്രാമുകള് തടസ്സപ്പെട്ടത് കാഴ്ചക്കാരെ നിരാശരാക്കിയതായും റിപ്പോര്ട്ടുകളുണ്ട്.
കല്വര് മാക്സ് ഉന്നയിച്ച 128.42 കോടിയുടെ ആവശ്യം നടപ്പിലാക്കുന്നത് സ്റ്റേ ചെയ്തുകൊണ്ട് നേരത്തെ ട്രിബ്യൂണല് ടാറ്റ പ്ലേയ്ക്ക് ഇടക്കാല ഉത്തരവ് വന്നിരുന്നു. രണ്ടാഴ്ചയ്ക്കുള്ളില് ടാറ്റ പ്ലേ 40 കോടി നിക്ഷേപിക്കണമെന്ന വ്യവസ്ഥയിലായിരുന്നു ഇത്. ടാറ്റ പ്ലേയെ ലക്ഷ്യം വച്ചുള്ള സ്റ്റാറ്റിക് സന്ദേശങ്ങളോ സ്ക്രോളുകളോ സംപ്രേഷണം ചെയ്യുന്നത് നിര്ത്താന് ടിഡിഎസ്എടി കള്വര് മാക്സിനോട് നിര്ദ്ദേശിച്ചിരുന്നു. ഈ വിഷയത്തില് അടുത്ത വാദം കേള്ക്കല് ഈമാസം 26-ന് നടക്കും.
കല്വര് മാക്സ് ഒരേസമയം ബോംബെ ഹൈക്കോടതിയില് ട്രൈബ്യൂണലിന്റെ ഉത്തരവിന്റെ ചില ഭാഗങ്ങളെ, പ്രത്യേകിച്ച് ടാറ്റ പ്ലേ സോണി ചാനലുകള് നീക്കം ചെയ്യുന്നതിനെക്കുറിച്ചുള്ള പൊതു പ്രസ്താവനകള് പുറപ്പെടുവിക്കുന്നതിനുള്ള നിയന്ത്രണത്തെ, ചോദ്യം ചെയ്തിട്ടുണ്ട്. കോടതി ഇടക്കാല ഉത്തരവ് നിഷേധിച്ചെങ്കിലും, പരിമിതമായ വിശദീകരണം പോസ്റ്റ് ചെയ്യാന് പ്രക്ഷേപകനെ അനുവദിച്ചു. ടാറ്റ പ്ലേയില് സോണി ചാനലുകള് വ്യക്തിഗതമായും സോണി ബൊക്കേകള്ക്കുള്ളിലും ലഭ്യമാണെന്ന് ഉപഭോക്താക്കളെ അറിയിച്ചു.
