By അഖിൽ സത്യൻ സംവിധാനം ചെയ്ത ചിത്രമാണ് ‘സർവ്വം മായ’. ആഗോള ബോക്സ് ഓഫീസിൽ നിന്ന് ചിത്രം ഇതുവരെ 150.45 കോടി രൂപയാണ് സ്വന്തമാക്കിയിരിക്കുന്നത്. കേരളത്തിൽ നിന്ന് മാത്രം 78 കോടി രൂപ നേടിയ ചിത്രം, ജിസിസിയിൽ നിന്ന് 4.11 മില്യൺ ഡോളറും നോർത്ത് അമേരിക്കയിൽ നിന്ന് 895K ഡോളറും സ്വന്തമാക്കി റെക്കോർഡ് നേട്ടം കുറിച്ചു. നിവിൻ പോളിയും അജു വർഗീസും ഒന്നിച്ച പത്താമത്തെ ചിത്രം എന്ന പ്രത്യേകതയും ഈ വിജയത്തിന് മാറ്റു കൂട്ടുന്നു.
ചിത്രത്തിലെ ഹൃദയസ്പർശിയായ പല രംഗങ്ങളും യഥാർത്ഥ ജീവിതത്തിൽ നിന്ന് പ്രചോദനം ഉൾക്കൊണ്ടതാണെന്ന് സംവിധായകൻ വെളിപ്പെടുത്തി. ചിത്രത്തിന്റെ ക്ലൈമാക്സിനോട് അനുബന്ധിച്ചുള്ള വൈകാരികമായ രംഗം, തന്റെ ഒരു കുടുംബ സുഹൃത്തിന്റെ ജീവിതത്തിലുണ്ടായ ദൗർഭാഗ്യകരമായ അനുഭവത്തിൽ നിന്ന് രൂപപ്പെടുത്തിയതാണെന്ന് അഖിൽ സത്യൻ പറഞ്ഞു.
നിലവിൽ ഡിസ്നി പ്ലസ് ഹോട്ട്സ്റ്റാറിലൂടെ ചിത്രം ഒടിടി സ്ട്രീമിംഗ് തുടരുകയാണ്. ജനാർദ്ദനൻ, രഘുനാഥ് പലേരി, മധു വാര്യർ, അൽതാഫ് സലിം, പ്രീതി മുകുന്ദൻ തുടങ്ങിയ വലിയ താരനിര തന്നെ ചിത്രത്തിൽ അണിനിരക്കുന്നുണ്ട്. സാങ്കൽപ്പിക കഥകളേക്കാൾ താൻ കണ്ട മനുഷ്യരെയും അനുഭവങ്ങളെയും സിനിമയിലേക്ക് പകർത്താനാണ് തനിക്ക് താൽപ്പര്യമെന്നും അഖിൽ സത്യൻ അഭിമുഖത്തിൽ വ്യക്തമാക്കി.
