By ഹാക്കിംഗ് മുന്നറിയിപ്പുമായി പ്രമുഖ ദക്ഷിണ കൊറിയന് ടെക് കമ്പനി സാംസങ്. ഗാലക്സി സ്മാര്ട്ട്ഫോണുകള്ക്ക് നേരെ ഹാക്കിംഗ് ശ്രമം നടക്കുന്നുണ്ടെന്ന മുന്നറിയിപ്പാണ് ഇപ്പോള് നല്കിയിരിക്കുന്നത്. സെപ്റ്റംബറിലെ സുരക്ഷാ അപ്ഡേറ്റ് കമ്പനി പരിഷ്കരിച്ചിരിക്കുകയാണ്. യോഗ്യതയുള്ള എല്ലാ ഫോണുകള്ക്കും ഇപ്പോള് അപ്ഡേറ്റ് ലഭിക്കുന്നതാണ്. ആന്ഡ്രോയ്ഡ് 13 അല്ലെങ്കില് അതിനു ശേഷമുള്ള പതിപ്പുകളില് പ്രവര്ത്തിക്കുന്ന ഉപകരണങ്ങളെയാണ് ഈ ഭീഷണി ബാധിക്കുന്നത്. ആപ്പിളിന്റെ ഐഫോണുകളെ ബാധിക്കുന്ന സാങ്കേതിക പിഴവുകള് വാട്സ്ആപ്പ് കഴിഞ്ഞ മാസം റിപ്പോര്ട്ട് ചെയ്തിരുന്നു. ഇതിന് സമാനമാണ് സാംസങ് ഗാലക്സി ഫോണുകളെയും ബാധിക്കുന്ന പ്രശ്നം എന്നാണ് റിപ്പോര്ട്ടുകള്. ഒരു ഉപയോക്താവിന്റെ ഉപകരണത്തിലേക്കും അതില് സംഭരിച്ചിരിക്കുന്ന ഡാറ്റയിലേക്കും അനധികൃത ആക്സസ് നേടുന്നതിന് ഈ പ്രശ്നത്തിന് സാധിക്കും എന്നും സാംസങ് പറയുന്നു.
ഹാക്കര്മാര്ക്ക് വിദൂര ഉപകരണങ്ങള് ഉപയോഗിച്ച് ഗാലക്സി ഫോണില് ഇമേജ്-പാഴ്സിംഗ് ലൈബ്രറിയിലെ മെമ്മറി ദുര്ബലത മുന്നിര്ത്തി ദോഷകരമായ കോഡുകള് പ്രവര്ത്തിപ്പിക്കാന് സാധിക്കുമെന്നാണ് സാംസങ് മുന്നറിയിപ്പില് വ്യക്തമാക്കുന്നത്. ഇത് മറ്റ് മെസഞ്ചറുകളെയാണോ അതോ വാട്സ്ആപ്പിനെയാണോ ബാധിക്കുക എന്നത് ഇതുവരെ വ്യക്തമല്ല. എന്നാല് മൂന്ന് ബില്യണ് ഉപയോക്താക്കള് ഉള്ള വാട്സ്ആപ്പ് മിക്കവാറും എല്ലാ ഗാലക്സി ഫോണുകളിലും ഇന്സ്റ്റാള് ചെയ്തിട്ടുണ്ട്. അതിനാല് ഇത് ഒരു വലിയ ആക്രമണ സാധ്യത തുറക്കുന്നു.
ഗൂഗിളിന്റെ പ്രോജക്റ്റ് സീറോയിലെ മൂന്നാം കക്ഷി ഇമേജ് ഹാന്ഡ്ലിംഗ് സോഫ്റ്റ്വെയറിന് പരിധിക്ക് പുറത്തുള്ള കോഡിംഗ് ആണ് അപകടസാധ്യതയെന്ന് സാംസങ് പറയുന്നു. ഓഗസ്റ്റ് 13-ന് വെളിപ്പെടുത്തിയ ഈ ഭീഷണി ആന്ഡ്രോയ്ഡ് 13, 14, 15, 16 എന്നിവയെ ബാധിക്കുന്നു. ഈ പ്രശ്നം പരിഹരിക്കുന്നതിനായി സാംസങും വാട്ട്സ്ആപ്പും പാച്ചുകള് പുറത്തിറക്കിയിട്ടുണ്ടെന്ന് ബ്ലാക്ക് ഡക്കിന്റെ നിവേദിത മൂര്ത്തി സ്ഥിരീകരിച്ചതായി ഫോര്ബ്സ് റിപ്പോര്ട്ട് ചെയ്യുന്നു.
