By എന്റര്‍പ്രൈസ് എഐ സൊല്യൂഷനുകള്‍ വികസിപ്പിക്കുകയെന്ന ലക്ഷ്യത്തോടെ റിലയന്‍സ് ഇന്‍ഡസ്ട്രീസ് ലിമിറ്റഡുമായി തന്ത്രപരമായ സഹകരണം പ്രഖ്യാപിച്ച് ടെക് ഭീമനായ മെറ്റ. ഇന്ത്യന്‍ വിപണിക്കും തെരഞ്ഞെടുക്കപ്പെട്ട ആഗോള വിപണികള്‍ക്കുമായി ലാമ ഓപ്പണ്‍സോഴ്‌സ് ലാര്‍ജ് ലാംഗ്വേജ് മോഡല്‍ അധിഷ്ഠിതമായ എന്റര്‍പ്രൈസ് എഐ സൊല്യൂഷനുകളാണ് വികസിപ്പിക്കുക. ഈ കരാറിന്റെ അടിസ്ഥാനത്തില്‍ രണ്ട് കമ്പനികളും ചേര്‍ന്ന് ആദ്യ ഘട്ടത്തില്‍ 855 കോടി രൂപ (100 മില്യണ്‍ ഡോളര്‍) നിക്ഷേപിക്കും. ഇതില്‍ റിലയന്‍സിന് 70 ശതമാനവും മെറ്റയ്ക്ക് 30 ശതമാനവുമാണ് വിഹിതമുണ്ടാവുക. മെറ്റയുടെ ഓപ്പണ്‍സോഴ്‌സ് എഐ മോഡലായ ലാമ അടിസ്ഥാനമാക്കിയാണ് റിലയന്‍സ് മെറ്റ സഹകരണ സംരംഭം സാധ്യമാവുന്നത്. എന്റര്‍പ്രൈസ് എഐ പ്ലാറ്റ്‌ഫോം, പ്രീകോണ്‍ഫിഗേര്‍ഡ് എഐ സൊല്യൂഷന്‍സ് എന്നിങ്ങനെ രണ്ട് സേവനങ്ങളാണ് ഈ ആഗോള പങ്കാളിത്തം ലഭ്യമാക്കുക.
ആര്‍ട്ടിഫിഷ്യല്‍ ഇന്റലിജന്‍സ് രംഗത്തെ ആഗോള കരുത്തരിലൊന്നായ മെറ്റയും ഡിജിറ്റല്‍ അടിസ്ഥാന സൗകര്യങ്ങളില്‍ മുന്‍പന്തിയിലുള്ള റിലയന്‍സ് ഇന്‍ഡസ്ട്രീസും തമ്മിലുള്ള സഹകരണം ഇന്ത്യയുടെ എഐ ചുവടുവെപ്പുകളില്‍ നിര്‍ണായകമാകുമെന്നാണ് പ്രതീക്ഷ. മെറ്റയുടെ ലാമ മോഡലുകളെ ആര്‍ഐഎല്ലിന്റെ ശക്തമായ ഡിജിറ്റല്‍ അടിത്തറയുമായി സംയോജിപ്പിക്കുന്നതിലൂടെ ഈ പങ്കാളിത്തത്തിന് ഉയര്‍ന്ന പ്രകടന നിലവാരമുള്ള എഐ സൊല്യൂഷനുകള്‍ ചെറിയ ചെലവില്‍ വിപണിയിലെത്തിക്കാന്‍ സാധിക്കുമെന്നാണ് പ്രതീക്ഷ.
