By 5ജിയേക്കാള്‍ പത്തുമടങ്ങ് വേഗമുള്ള 6ജി ചിപ്പ് എത്തുന്നു. സെക്കന്‍ഡില്‍ 100 ജിഗാബൈറ്റ് വേഗത കൈവരിക്കാന്‍ സാധിക്കുന്ന പ്രോട്ടോടൈപ്പ് 6ജി ചിപ്പാണ് പുറത്തെത്തിയത്. 5ജിയുടെ പരമാവധി വേഗതയേക്കാള്‍ പത്തുമടങ്ങ് വേഗത കൈവരിക്കാന്‍ 6ജിക്ക് സാധിക്കും. ഇന്ന് ഉപഭോക്താക്കള്‍ അനുഭവിക്കുന്ന സ്പീഡിന്റെ അഞ്ഞൂറിരട്ടി വരും 6ജിയുടെ വേഗത. പീക്കിംഗ് യൂണിവേഴ്‌സിറ്റി, സിറ്റി യൂണിവേഴ്‌സിറ്റി ഓഫ് ഹോങ്കോങ്ങ്, യൂണിവേഴ്‌സിറ്റി ഓഫ് കാലിഫോര്‍ണിയ, സാന്താ ബാര്‍ബറ എന്നിവിടങ്ങളിലെ ഗവേഷകര്‍ ചേര്‍ന്നാണ് പയനിയറിംഗ് ചിപ്പ് വികസിപ്പിച്ചിരിക്കുന്നത്. ചിപ്പിന്റെ വിശദാംശങ്ങള്‍ നേച്ചര്‍ ജേണലില്‍ പ്രതിപാദിച്ചിരിക്കുന്നു. 11 x 1.7 മില്ലിമീറ്ററാണ് ചിപ്പിന്റെ വലിപ്പം. 0.5 GHz മുതല്‍ 115 GHz വരെയുള്ള ഒരു അള്‍ട്രാബ്രോഡ് ഫ്രീക്വന്‍സി ബാന്‍ഡില്‍ പ്രവര്‍ത്തിക്കാന്‍ ഇതിന് സാധിക്കും. 2030 വരെ 6ജി ചിപ്പുകള്‍ പുറത്തിറങ്ങാന്‍ സാധ്യതയില്ലെന്നാണ് വിദഗ്ദര്‍ വിലയിരുത്തുന്നത്. ഡാറ്റ ആവശ്യകത ആഗോളതലത്തില്‍ വര്‍ധിക്കുന്ന സാഹചര്യത്തില്‍ മിനിയേച്ചര്‍ ചിപ്പ് പുത്തന്‍ സാങ്കേതിക വിപ്ലവത്തിന് വഴിയൊരുക്കുമെന്നാണ് പ്രതീക്ഷിക്കുന്നത്.
