By ഇന്ത്യയിൽ സ്റ്റാർലിങ്കിന്റെ പ്രവർത്തനാനുമതി വൈകുന്നതിൽ രൂക്ഷമായ വിമർശനവുമായി ടെക് ശതകോടീശ്വരൻ ഇലോൺ മസ്‌ക് രംഗത്ത്. തന്റെ ഉടമസ്ഥതയിലുള്ള എക്‌സ് പ്ലാറ്റ്‌ഫോമിലൂടെയാണ് അദ്ദേഹം കടുത്ത പ്രതികരണവുമായി എത്തിയത്. ഇന്ത്യയിലെ ചില കുത്തക മുതലാളിമാർ സ്റ്റാർലിങ്കിന്റെ പ്രവർത്തനം തടസ്സപ്പെടുത്തുന്നു എന്ന് കഴിഞ്ഞ ബുധനാഴ്ച മസ്‌ക് ആരോപിച്ചിരുന്നു. ഇതിന്റെ തുടർച്ചയെന്നോണം, ഇന്ത്യയിലെ കുത്തകാവകാശത്തെയും സേവനം വൈകുന്നതിനെയും പരിഹസിച്ച് അദ്ദേഹം വീണ്ടും പോസ്റ്റ് പങ്കുവെക്കുകയാണുണ്ടായത്.
‘പ്രിയ അംബാനി, താങ്കളാണ് ഇന്ത്യയുടെ യഥാർത്ഥ തലവൻ എന്ന് തിരിച്ചറിയാത്തതിലുള്ള എന്റെ ക്ഷമാപണം സ്വീകരിക്കണം’ എന്ന് പരിഹസിച്ചുകൊണ്ടാണ് മസ്‌ക് തന്റെ കുറിപ്പ് ആരംഭിച്ചത്. ഇന്ത്യയിലെ മഹത്തായ ജനവിഭാഗങ്ങളെ ചൂഷണം ചെയ്തുകൊണ്ടുള്ള കുത്തകാവകാശം തുടരാനാണ് ആഗ്രഹിക്കുന്നതെങ്കിലും, സ്റ്റാർലിങ്കിന് കൂടി മത്സരിക്കാൻ അനുവാദം നൽകുന്ന കാര്യം പരിഗണിക്കണമെന്ന് അദ്ദേഹം ആവശ്യപ്പെട്ടു. മറ്റ് രാജ്യങ്ങളിലെപ്പോലെ ഇന്ത്യയിലും ഇന്റർനെറ്റ് സൗകര്യമില്ലാത്ത നിരവധി പ്രദേശങ്ങളുണ്ടെന്നും, ഇത് കുട്ടികളുടെ വിദ്യാഭ്യാസത്തിനും ചെറുകിട സംരംഭകരുടെ വളർച്ചയ്ക്കും തടസ്സമാകുന്നുണ്ടെന്നും മസ്‌ക് തന്റെ പോസ്റ്റിൽ ചൂണ്ടിക്കാണിച്ചു.
സ്‌പേസ്എക്‌സിന്റെ സ്റ്റാർലിങ്കിന് പുറമെ ഭാരതി ഗ്രൂപ്പിന്റെ യൂടൽസാറ്റ് വൺവെബ്, ജിയോ പ്ലാറ്റ്‌ഫോംസിന്റെ ജിയോ സാറ്റലൈറ്റ് കമ്മ്യൂണിക്കേഷൻസ് എന്നീ മൂന്ന് കമ്പനികൾക്ക് രാജ്യത്ത് ഉപഗ്രഹ ഇന്റർനെറ്റ് സർവീസ് നൽകാനുള്ള ടെലികോം ലൈസൻസ് ലഭിച്ചിരുന്നു. ലൈസൻസ് ലഭിച്ചെങ്കിലും സ്‌പെക്ട്രം അനുവദിക്കുന്നതിനും സേവനങ്ങൾ ആരംഭിക്കുന്നതിനും കമ്പനികൾ കർശന സുരക്ഷാ മാനദണ്ഡങ്ങൾ പാലിക്കേണ്ടതുണ്ട്. ഇതിന്റെ ഭാഗമായുള്ള സുരക്ഷാ വിലയിരുത്തലുകൾ നിലവിൽ പുരോഗമിച്ചുകൊണ്ടിരിക്കുകയാണെന്ന് കേന്ദ്ര സർക്കാർ വ്യക്തമാക്കിയ പശ്ചാത്തലത്തിലാണ് മസ്കിന്റെ ഈ പുതിയ വിമർശനം.
