By യൂട്യൂബിൽ വീഡിയോകൾ തിരയുന്നത് കൂടുതൽ എളുപ്പമാക്കാനും സംവേദനാത്മകമാക്കാനും ലക്ഷ്യമിട്ട് പുതിയ ആർട്ടിഫിഷ്യൽ ഇന്റലിജൻസ് ഫീച്ചർ അവതരിപ്പിക്കുന്നു. ‘ആസ്ക്’ എന്ന് പേരിട്ടിരിക്കുന്ന ഈ പുതിയ ടൂൾ പരീക്ഷണാടിസ്ഥാനത്തിൽ തിരഞ്ഞെടുത്ത ഉപയോക്താക്കൾക്കായി ലഭ്യമാക്കിത്തുടങ്ങി. നിലവിൽ അമേരിക്കയിലെ ആൻഡ്രോയിഡ് ഉപയോക്താക്കളിൽ ചിലർക്ക് മാത്രമാണ് പരീക്ഷണാടിസ്ഥാനത്തിൽ ഇത് ലഭ്യമാക്കിയിട്ടുള്ളത്. ഗൂഗിളിന്റെ ജെമിനി എന്ന എഐ സാങ്കേതികവിദ്യയുടെ സഹായത്തോടെയാണ് ഇത് പ്രവർത്തിക്കുന്നത്. കീവേഡുകൾ ഓർത്തെടുത്ത് നൽകുന്നതിന് പകരം സംഭാഷണങ്ങളിലൂടെ വിവരങ്ങൾ കണ്ടെത്താൻ സാധിക്കുന്നത് ഉപയോക്താക്കൾക്ക് വലിയ ഗുണകരമാകുമെന്നാണ് വിലയിരുത്തപ്പെടുന്നത്. പരീക്ഷണങ്ങൾ വിജയിച്ചാൽ വൈകാതെ തന്നെ ഇന്ത്യയുൾപ്പെടെയുള്ള ആഗോള വിപണികളിലേക്ക് ഈ ഫീച്ചർ എത്തും.
പ്രധാന സവിശേഷതകൾ
സംഭാഷണ രൂപത്തിലുള്ള സെർച്ച്: പരമ്പരാഗതമായ കീവേഡുകൾ ഉപയോഗിച്ച് സെർച്ച് ചെയ്യുന്നതിന് പകരം, മനുഷ്യരോട് സംസാരിക്കുന്നത് പോലെ ലളിതമായ ഭാഷയിൽ യൂട്യൂബിനോട് ചോദ്യങ്ങൾ ചോദിക്കാൻ സാധിക്കും.
വീഡിയോ വിവരണങ്ങൾ: ഒരു വീഡിയോ കാണുന്നതിനിടയിൽ ആ വീഡിയോയിലെ പ്രധാന കാര്യങ്ങളെക്കുറിച്ചോ സംശയങ്ങളെക്കുറിച്ചോ യൂട്യൂബിനോട് തന്നെ ചോദിക്കാം. വീഡിയോ കാണുന്ന സമയം ലാഭിക്കാൻ ഇതിലൂടെ സാധിക്കും.
ക്വിസുകളും ടോപ്പിക്കുകളും: വീഡിയോയുടെ ഉള്ളടക്കം അടിസ്ഥാനമാക്കി ക്വിസുകൾ നൽകാനും ബന്ധപ്പെട്ട മറ്റ് വിഷയങ്ങൾ നിർദ്ദേശിക്കാനും ഈ എഐ ടൂളിന് കഴിയും.
