By ആഗോളതലത്തിൽ ആർട്ടിഫിഷ്യൽ ഇന്റലിജൻസ് തരംഗം ആഞ്ഞടിക്കുമ്പോഴും ഇന്ത്യയിലെ ഗൂഗിൾ പ്ലേ സ്റ്റോറിൽ ചാറ്റ്ജിപിടിയെ പിന്തള്ളി ഇന്ത്യൻ ഓയിലിന്റെ എൽപിജി ബുക്കിംഗ് ആപ്പായ ‘ഇന്ത്യൻ ഓയിൽ വൺ’ ഒന്നാമതെത്തി. പശ്ചിമേഷ്യൻ സംഘർഷത്തെത്തുടർന്ന് പാചകവാതക വിതരണത്തിൽ തടസ്സങ്ങൾ നേരിട്ടതാണ് ഈ അപ്രതീക്ഷിത മാറ്റത്തിന് പിന്നിലെ പ്രധാന കാരണം. സൗജന്യമായി ഡൗൺലോഡ് ചെയ്യാവുന്ന ആപ്പുകളുടെ പട്ടികയിലാണ് ഇന്ത്യൻ ഓയിൽ വൺ നിലവിൽ ഒന്നാം സ്ഥാനത്ത് എത്തിയിരിക്കുന്നത്.
പശ്ചിമേഷ്യയിലെ പ്രതിസന്ധി മൂലം പാചകവാതക ലഭ്യതയിൽ അനിശ്ചിതത്വം ഉണ്ടായതോടെ സിലിണ്ടറുകൾ ബുക്ക് ചെയ്യാനും അവയുടെ വിതരണം ട്രാക്ക് ചെയ്യാനും ഉപയോക്താക്കൾ വലിയ തോതിൽ ഡിജിറ്റൽ പ്ലാറ്റ്ഫോമുകളെ ആശ്രയിക്കാൻ തുടങ്ങി. ഇന്ത്യൻ ഓയിൽ വൺ ആപ്പിലൂടെ റീഫിൽ സിലിണ്ടറുകൾ ബുക്ക് ചെയ്യാനും ഡെലിവറി സ്റ്റാറ്റസ് തത്സമയം നിരീക്ഷിക്കാനും പുതിയ കണക്ഷനുകൾക്കായി അപേക്ഷിക്കാനും സാധിക്കും. ഈ സൗകര്യങ്ങളാണ് പ്രതിസന്ധി ഘട്ടത്തിൽ ജനങ്ങളെ ആപ്പിലേക്ക് കൂടുതൽ ആകർഷിച്ചത്.
ഇന്ത്യൻ ഓയിൽ വണ്ണിന് പുറമെ എച്ച്പി പേ, ഹലോ ബിപിസിഎൽ തുടങ്ങിയ മറ്റ് എണ്ണക്കമ്പനികളുടെ ആപ്പുകളും ഡൗൺലോഡുകളുടെ എണ്ണത്തിൽ വലിയ വർധനവ് രേഖപ്പെടുത്തിയിട്ടുണ്ട്. വാണിജ്യ എൽപിജി വിതരണത്തിന് ചില നിയന്ത്രണങ്ങൾ നിലവിലുണ്ടെങ്കിലും ഗാർഹിക ഉപയോക്താക്കൾക്ക് സർക്കാർ മുൻഗണന നൽകുന്നുണ്ട്. ദൈനംദിന ജീവിതത്തിലെ അത്യാവശ്യ ഘട്ടങ്ങൾ വരുമ്പോൾ സാങ്കേതിക വിദ്യയേക്കാൾ ഉപഭോക്താക്കൾ പ്രായോഗിക ആവശ്യങ്ങൾക്കാണ് മുൻഗണന നൽകുന്നതെന്ന് ഈ മാറ്റം അടിവരയിടുന്നു.
