By ചാറ്റ് ജിപിടിയിലൂടെ ഇനി യുപിഐ പേയ്മെന്റും നടത്താം. ചാറ്റ്ബോട്ടിന് ഉപയോക്താവിന് വേണ്ടി പേയ്മെന്റ് പൂര്ത്തിയാക്കാന് കഴിയുന്ന ‘ഏജന്റിക് പേയ്മെന്റ്’ എന്ന സംവിധാനം അവതരിപ്പിക്കാന് ഒരുങ്ങിയിരിക്കുകയാണ് ഓപ്പണ് എഐ. ഇതിന്റെ ഭാഗമായി നാഷണല് പേയ്മെന്റ്സ് കോര്പ്പറേഷന് ഓഫ് ഇന്ത്യ (NPCI), Razorpay എന്നിവരുമായി ഓപ്പണ് എഐ സഹകരിച്ചു. ഈ പുതിയ സവിശേഷത ഉപയോക്താക്കള്ക്ക് ചാറ്റ് ആപ്പ് വിടാതെ തന്നെ വാങ്ങലുകള് പൂര്ത്തിയാക്കാന് സൗകര്യമൊരുക്കുന്നു.
ചാറ്റ് ജിപിടിയുമായി സംസാരിച്ച് ആപ്പിനുള്ളില് വച്ച് തന്നെ പര്ച്ചേസുകള് പൂര്ത്തിയാക്കി ഓര്ഡര് ചെയ്ത് പണമടയ്ക്കാന് കഴിയുന്ന തരത്തിലാണ് സാങ്കേതികവിദ്യയുടെ രൂപകല്പന. ഇതിലൂടെ വളരെ സുരക്ഷിതമായി യുപിഐ പേയ്മെന്റുകള് നടത്താന് കഴിയുമെന്ന് രണ്ട് കമ്പനികളും അറിയിച്ചു.
പൈലറ്റ് ഘട്ടത്തിലെ ബാങ്കിംഗ് പങ്കാളികളില് ആക്സിസ് ബാങ്ക്, എയര്ടെല് പേയ്മെന്റ്സ് ബാങ്ക് എന്നിവ ഉള്പ്പെടുന്നു. ടാറ്റാ ഗ്രൂപ്പിന്റെ ഉടമസ്ഥതയിലുള്ള ക്വിക്ക് കൊമേഴ്സ് പ്ലാറ്റ്ഫോമായ ബിഗ് ബാസ്കറ്റ് ആണ്, ഈ എഐ ശക്തിപ്പെടുത്തിയ ഷോപ്പിംഗ് അനുഭവം ഉപഭോക്താക്കള്ക്ക് നല്കുന്ന ആദ്യത്തെ പ്ലാറ്റ്ഫോമുകളിലൊന്ന്.
കമ്പനികള് പങ്കുവെച്ച ഉദാഹരണമനുസരിച്ച് ഉപയോക്താവിന് ചാറ്റ ജിപിടിയോട് ഇങ്ങനെ ആവശ്യപ്പെടാന് കഴിയും. തുടര്ന്ന് ചാറ്റ്ബോട്ട് ബിഗ് ബാസ്കറ്റ് കാറ്റലോഗ് പരിശോധിക്കുകയും ഉല്പ്പന്ന ഓപ്ഷനുകള് ഉപയോക്താവിന് മുന്നില് അവതരിപ്പിക്കുകയും ചെയ്യും. ഉപയോക്താവ് സ്ഥിരീകരണം നല്കിക്കഴിഞ്ഞാല്, Razorpay-യുടെ പേയ്മെന്റ് സ്റ്റാക്ക് വഴി ഓര്ഡര് നല്കപ്പെടും. ഈ അനുഭവം പൂര്ണ്ണമായും ഉപയോക്താവിന്റെ നിയന്ത്രണത്തിലായിരിക്കും. ഓര്ഡര് തത്സമയം ട്രാക്ക് ചെയ്യാനും, ആവശ്യമെങ്കില് തല്ക്ഷണം റദ്ദാക്കാനും ഉപയോക്താക്കള്ക്ക് സാധിക്കും.
