By ഹൃത്വിക് റോഷന്‍, ജൂനിയര്‍ എന്‍ടിആര്‍, കിയാര അദ്വാനി എന്നിവര്‍ പ്രധാന വേഷങ്ങളിലെത്തുന്ന ചിത്രം ‘വാര്‍ 2’ സെന്‍സര്‍ ബോര്‍ഡിന്റെ വെട്ടിച്ചുരുക്കലുകള്‍ക്ക് ശേഷം റിലീസിനൊരുങ്ങുന്നു. ഓഗസ്റ്റ് 14ന് തിയേറ്ററുകളില്‍ എത്താന്‍ തയ്യാറെടുക്കുന്ന ചിത്രത്തിന് U/A 16+ സര്‍ട്ടിഫിക്കറ്റാണ് ലഭിച്ചിരിക്കുന്നത്.
ചിത്രത്തിലെ ആക്ഷന്‍ രംഗങ്ങളില്‍ യാതൊരു മാറ്റങ്ങളും നിര്‍ദ്ദേശിച്ചിട്ടില്ല. എന്നിരുന്നാലും ചിത്രത്തിലെ ചില സംഭാഷണങ്ങളും രംഗങ്ങളും സെന്‍സര്‍ ബോര്‍ഡ് നീക്കം ചെയ്യാനോ മാറ്റം വരുത്താനോ ആവശ്യപ്പെട്ടിട്ടുണ്ട്.
ചിത്രത്തിൽ വിവിധ പരാമര്‍ശങ്ങളുള്ള ആറിടങ്ങളില്‍ സംഭാഷണങ്ങള്‍ മ്യൂട്ട് ചെയ്യണമെന്നാണ് സെന്‍സര്‍ ബോര്‍ഡ് നിര്‍ദ്ദേശിച്ചത്. കൂടാതെ ഒരു അശ്ലീല പരാമര്‍ശം മാറ്റി പകരം പുതിയൊരു വാക്യം ചേര്‍ക്കുകയും ചെയ്തു.
‘പ്രലോഭനകരമായ’ രംഗങ്ങള്‍ ഒന്‍പത് സെക്കന്‍ഡായി ചുരുക്കാനും ബോര്‍ഡ് ആവശ്യപ്പെട്ടിട്ടുണ്ട്. കിയാര അദ്വാനിയുടെ ബിക്കിനി രംഗങ്ങളാണ് ഇത്തരത്തില്‍ വെട്ടിച്ചുരുക്കിയതെന്നാണ് സൂചന. രണ്ട് മണിക്കൂര്‍ 59 മിനിറ്റ് 49 സെക്കന്‍ഡായിരുന്ന ചിത്രത്തിന്റെ ആകെ ദൈര്‍ഘ്യം, സെന്‍സര്‍ ബോര്‍ഡിന്റെ നിര്‍ദ്ദേശങ്ങള്‍ക്ക് ശേഷം രണ്ട് മണിക്കൂര്‍ 51 മിനിറ്റ് 44 സെക്കന്‍ഡായി ചുരുങ്ങി.
അയാന്‍ മുഖര്‍ജി സംവിധാനം ചെയ്ത ‘വാര്‍ 2’വില്‍ ഹൃത്വിക് റോഷന്‍ മേജര്‍ കബീര്‍ ധലിവാളായും ജൂനിയര്‍ എന്‍ടിആര്‍ വിക്രമായും കിയാര അദ്വാനി കാവ്യ ലുത്രയായും എത്തുന്നു. സ്വാതന്ത്ര്യദിനത്തോടെ തിയേറ്ററുകളിലെത്തുന്ന രജനീകാന്തിന്റെ ‘കൂലി’ എന്ന സിനിമയുമായി ബോക്‌സ് ഓഫീസില്‍ മത്സരിക്കുമെന്നാണ് പ്രതീക്ഷിക്കുന്നത്.
