By കൊച്ചി: ആയിരം കോടി വാർഷിക വിറ്റുവരവിൻ്റെ വിസ്മയ നേട്ടത്തിൽ കേരള വിഷൻ. കേബിൾ ടിവി ഓപ്പറേറ്റേർസ് അസോസിയേഷൻ നേതൃത്വം നൽകുന്ന കേരളവിഷൻ്റെ 1000 കോടി നേട്ടം കേരളത്തിന് തികച്ചും അഭിമാനമാണെന്ന് വ്യവസായമന്ത്രി പി. രാജീവ് പറഞ്ഞു. കേരളവിഷൻ ഗ്രൂപ്പിന്റെ വാർഷികവിറ്റുവരവ് ആയിരം കോടി പിന്നിട്ടതിന്റെ ഭാഗമായി സംഘടിപ്പിച്ച ആഘോഷപരിപാടി ‘ഗ്രാന്റേ 1000″ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
ഒരു ചെറുകിട കൂട്ടായ്മ രാജ്യത്തെ വൻകിട കോർപ്പറേറ്റുകളുമായി മത്സരിച്ച് ഡിജിറ്റൽ കേബിൾ ടിവി, ബ്രോഡ്ബാൻഡ് രംഗത്ത് നേടിയെടുത്ത വിജയം നിർണ്ണായകവും കേരളത്തിൻ്റെ വളർച്ചയുടെ നാഴികക്കല്ലുമാണെന്നും
മന്ത്രി പറഞ്ഞു.
” ഒന്നുമില്ലായ്മയിൽ നിന്ന് വളർന്നുവന്ന പ്രസ്ഥാനമാണ് കേരള വിഷൻ ഗ്രൂപ്പ്. തുടക്കത്തിലെ സാമ്പത്തിക പ്രതിസന്ധി, ജിഎസ്ടി റെയ്ഡുകളും മറ്റ് കേസുകളും ഉൾപ്പെടെ പ്രതിസന്ധികളുടെ പരമ്പരകൾ നേരിടേണ്ടിവന്നു. എങ്കിലും ഒരു
നിയമലംഘനവും നടത്താതെ കൈവരിച്ച നേട്ടമാണ് ആയിരംകോടിയുടെ വിറ്റുവരവ്. 5000ൽ പരം കേബിൾ ഓപ്പറേറ്റർമാരുടെ കൂട്ടായ്മയുടെ വിജയമാണിതെന്ന് ചടങ്ങിൽ അദ്ധ്യക്ഷത വഹിച്ച കേബിൾ ഓപ്പറേറ്റേഴ്സ് അസോസിയേഷൻ പ്രസിഡന്റ് പ്രവീൺ മോഹൻ പറഞ്ഞു. മാനേജിംഗ് ഡയറക്ടർ പി.പി. സുരേഷ്‌കുമാർ ആയിരം കോടി പ്രഖ്യാപനം നിർവഹിച്ചു. കേരള വിഷൻ ഗ്രൂപ്പ് ചെയർമാൻ കെ.ഗോവിന്ദൻ സ്വാഗതമാശംസിച്ചു. കേരളവിഷൻ അവതരിപ്പിക്കുന്ന ടിഎസ്പി (ടോട്ടൽ സൊല്യൂഷൻ പ്രൊവൈഡിംഗ്) സേവനം മന്ത്രി രാജീവ് ചടങ്ങിൽ ലോഞ്ച് ചെയ്തു.
ഡിസ്‌നി ഇന്ത്യ സ്ട്രാറ്റജിക് അഡ്വൈസർ ആൻഡ് കൺട്രി റെപ്രസെന്റിറ്റീവ് കെ. മാധവൻ വിശിഷ്ടാതിഥിയായി.
ഹൈബി ഈഡൻ എം.പി, ടി.ജെ. വിനോദ് എംഎൽഎ, മാതൃഭൂമി മാനേജിംഗ് ഡയരക്ടർ എം.വി. ശ്രേയാംസ്‌കുമാർ, തമിഴ്‌നാട് കേബിൾ ടിവി ഓപ്പറേറ്റേഴ്സ് അസോസിയേഷൻ പ്രസിഡന്റ് സഖിലൻ പത്മനാഭൻ, 24 ന്യൂസ് ചീഫ് എഡിറ്റർ ആർ. ശ്രീകണ്ഠൻ നായർ, റിപ്പോർട്ടർ ടിവി മാനേജിംഗ് ഡയറക്ടർ ആന്റോ അഗസ്റ്റിൻ, ടൈംസ് നൗ സീനിയർ വൈസ് പ്രസിഡണ്ട് മുഹമ്മദ് മുസ്തഫ, യുഎന്നിലെ ദുരന്തനിവാരണ വിദഗ്ദൻ മുരളി തുമാരകുടി, അമൃത ടിവി ബിസിനസ് മേധാവി ആർ. ശിവകുമാർ, ജനറൽ സെക്രട്ടറി പി.ബി. സുരേഷ് തുടങ്ങിയവർ സംസാരിച്ചു. കേരള വിഷൻ്റെ തുടക്കത്തിലും പങ്ക് വഹിച്ച ഭാരവാഹികളെയും ഡയരക്ടർമാരെയും ടീം ലീഡർമാരേയും ചടങ്ങിൽ ആദരിച്ചു. വളർച്ചയിലും മുൻഭാരവാഹികളെ ചടങ്ങിൽ ആദരിച്ചു.
സിഒഎ ഇന്ത്യയിലെ മുൻനിര ഡിജിറ്റൽ കേബിൾ, ബ്രോഡ്ബാൻ്റ് പ്രൊവൈഡർ എന്ന നിലയിലേക്കുള്ള കേരള വിഷൻ്റെ യാത്രയുടെ വിവിധ ഘട്ടങ്ങളിൽ സഹകരിച്ച പ്രമുഖ കേബിൾ ഓപ്പറേറ്റർമാർ, ബ്രോഡ്കാസ്റ്റർമാർ, ടെക്നോളജി കമ്പനികൾ, ട്രേഡർമാർ, ബിസിനസ്സ് പങ്കാളികൾ എന്നിവരുടെ പ്രതിനിധികൾ ആഘോഷത്തിൽ പങ്കെടുത്തു.
