By പ്രൈം ഡേ സെയിലിന് മുന്നോടിയായി രാജ്യത്തെ പതിനായിരക്കണക്കിന് ചെറുകിട, ഇടത്തരം വ്യാപാരികള്‍ക്ക് മാര്‍ഗനിര്‍ദ്ദേശങ്ങളുമായി ആമസോണ്‍. ജൂലൈ 12 മുതല്‍ 14 വരെ ആമസോണ്‍ പ്രൈം ഡേ സെയില്‍ നടക്കുന്നത്. ആകര്‍ഷകമായ ഡീലുകളും ഡിസ്‌കൗണ്ടുകളും ഓഫറുകളും ഈ മേളയിലുണ്ടാകും.
തുടര്‍ച്ചയായി ഒമ്പതാം വര്‍ഷമാണ് ഇന്ത്യയില്‍ ആമസോണ്‍ പ്രൈം ഡേ സെയില്‍ നടത്തുന്നത്. മൂന്ന് ദിവസങ്ങളിലായി നടക്കുന്ന ഈ പ്രത്യേക വില്‍പനയില്‍ ചെറുകിട ഇടത്തരം ഉല്‍പ്പന്നങ്ങള്‍ക്ക് കൂടുതല്‍ പ്രചാരം നേടാനും ഉപഭോക്താക്കള്‍ക്ക് മികച്ച ഉല്‍പ്പന്നങ്ങള്‍ കുറഞ്ഞ വിലയില്‍ ലഭിക്കാനും അവസരമൊരുക്കുമെന്ന് ആമസോണ്‍ ഇന്ത്യയുടെ സെല്ലിംഗ് പാര്‍ട്ണര്‍ സര്‍വീസസ് ഡയറക്ടര്‍ അമിത് നന്ദ പറഞ്ഞു. ചെറുകിട ഇടത്തരം വ്യാപാരങ്ങള്‍ക്ക് ഇകൊമേഴ്‌സിന്റെ പൂര്‍ണ സാധ്യതകള്‍ പ്രയോജനപ്പെടുത്താനും കൂടുതല്‍ കച്ചവടം ലഭിക്കാനുമുള്ള തങ്ങളുടെ പ്രതിബദ്ധതയാണ് ഇത്തരം പ്രൈം ഡേ സെയിലുകളെന്നും അദ്ദേഹം പറഞ്ഞു.
പ്രാദേശിക കടകള്‍, സ്റ്റാര്‍ട്ടപ്പുകള്‍, നെയ്ത്തുകാര്‍, വനിത സംരംഭകര്‍ തുടങ്ങി നിരവധി സാധാരണക്കാരുടെ തനതായ ഉല്‍പ്പന്നങ്ങളും ആമസോണിലുണ്ട.
ബിസിനസ്സ് പ്രകടനത്തെ അടിസ്ഥാനമാക്കിയുള്ള എസ്ടിഇപി പദ്ധതിയിലൂടെ മികച്ച പ്രകടനം കാഴ്ചവയ്ക്കുന്ന ബിസിനസുകളെ അംഗീകരിക്കുകയും അവര്‍ക്ക് പ്രതിഫലം നല്‍കുകയും ചെയ്യുന്നുണ്ട്. ഐഫോണ്‍ 15 സിരീസുകള്‍, വണ്‍പ്ലസ് വാച്ചുകള്‍, ഗൂഡ്ഡി ബോക്‌സുകള്‍ തുടങ്ങി നിരവധി സമ്മാനങ്ങളും വിജയികള്‍ക്ക് ലഭിക്കും. 10,000 രൂപയുടെ ആമസോണ്‍ ഗിഫ്റ്റ് കാര്‍ഡുകള്‍ നേടാനും അവസരവുമുണ്ട് എന്ന് ആമസോണ്‍ പറയുന്നു.
